Skólayfirvöld í Vesturbæjarskóla í Reykjavík sendu í gær tölvupóst til foreldra barna í skólanum, þar sem segir að nokkrir menn hafi reynt að ginna drengi í skólanum upp í bíl.
Í tölvupóstinum segir að um sé að ræða lítinn rauðan sendiferðabíl með rennihurð á hliðinni. Í honum hafi verið 4-5 ungir menn, sem hafi boðið drengjunum sælgæti.
Drengirnir náðu að hlaupa á brott og voru afar skelkaðir.
Talsmaður lögreglunnar í Vesturbænum staðfesti að tilkynning þessa efnis hefði borist frá skólanum. Hann vildi að öðru leyti ekki tjá sig um málið og sagði það vera í athugun.