Sorp. mbl.is/Frikki

Umhverfisstofnun tekur undir ábendingar Ríkisendurskoðunar sem fram koma í skýrslu um málefni sorpbrennslna og segir að eftirlit verði hert.

Telur Ríkisendurskoðun telur að umhverfisráðuneytið hafi ekki framfylgt skilyrðum undanþágu sem Ísland fékk frá tilskipun Evrópusambandsins um brennslu úrgangs með nægilega markvissum hætti. Þá er brýnt að Umhverfisstofnun beiti þeim lagaheimildum sem hún hefur til að tryggja að sorpbrennslustöðvar fari að settum reglum.

Fram kemur í tilkynningu að gerðar hafi verið umfangsmiklar breytingar á Umhverfisstofnun á fyrri hluta árs 2008 og í kjölfarið hafi verið mörkuð stefna til framtíðar. Skipuriti stofnunarinnar hafi verið breytt og nýir stjórnendur komið inn. Farið hafi verið yfir verkefni stofnunarinnar, eldri stefnur endurskoðaðar og í kjölfarið gerðar margvíslegar breytingar á starfseminni.

Í ljós hefur komið að bæta þurfi eftirlit stofnunarinnar og þá sérstaklega eftirfylgni og beitingu þvingunarúrræða. Fyrir 2008 hafi það heyrt til undantekninga að þvingunarúrræðum stofnunarinnar hafi verið beitt, eins og Ríkisendurskoðun bendir á. En frá árinu 2009 hafi þeim fjölgað hratt. Í tilkynningu frá Ríkisendurskoðun segir að „Umhverfisstofnun hafi að undanförnu breytt starfsháttum sínum og eflt eftirlit sitt með hvers kyns mengandi starfsemi.“

Þá sé ljóst að upplýsingamiðlun hafi verið ábótavant og þörf sé á því að upplýsingar séu aðgengilegar almenningi og tryggt að mikilvægum upplýsingum sé komið á framfæri opinberlega.

„Allar þær úrbætur sem Umhverfisstofnun tiltekur í skýrslu Ríkisendurskoðunar eru verkefni sem þegar hafði verið ákveðið að ráðast í til þess að styrkja starfsemi stofnunarinnar á grundvelli nýrrar stefnu frá árinu 2008. Stofnunin lítur á ábendingar Ríkisendurskoðunar sem stuðning við þá stefnu og hvatningu til þess að ljúka sem fyrst þeim umbótum sem unnið hefur verið að,“ segir í tilkynningu frá Umhverfisstofnun.

Nánar á vef stofnunarinnar.