Opið hús verður í tónlistarhúsinu Hörpu á laugardag og sunnudag en húsið verður formlega opnað á föstudagskvöld. Verður sýnt beint opnunarhátíðinni í Sjónvarpinu.
Á laugardag opnar húsið kl.11:00 og verður opið fyrir gesti og gangandi allan daginn í tveimur minni tónleikasölum Hörpu: Norðurljósum og Kaldalóni. Meðal þeirra sem koma fram eru Karlakórinn Fóstbræður, Gissur Páll Gissurarson, Kammersveit Reykjavíkur, Ólafur Arnalds, Caput-hópurinn, kór Íslensku óperunnar, Kristinn H. Árnason, Björn Thoroddsen og Kazumi Watanabe og tríó Tómasar R. Einarssonar sem leikur í anddyrinu.
Klukkan 20 á laugardagskvöldið hefjast rokktónleikar í Silfurbergi, næststærsta sal hússins. Þar koma fram Apparat Organ Quartet, Mammút, Agent Fresco, Valdimar, Hjaltalín, Jónas Sigurðsson og ritvélar framtíðarinnar, Lights on the Highway og HAM. Tónleikunum lýkur á miðnætti.
Í tilefni af opnun Hörpu verður ókeypis inn á alla þessa viðburði.
Á sunnudag verur húsið opnað kl. 11 og verður fjölbreytt barnadagskrá í gangi allan daginn. Í Eldborg verða tvennir barnatónleikar með Sinfóníuhljómsveit Íslands og Maxímús Músíkús. Á þá tónleika er þegar orðið uppselt en ókeypis er á aðra viðburði.
Í salnum Kaldalóni verður leikritið um herra Pott og ungfrú Lok sýnt kl 17 og 17:45. Frá kl. 13 verður sérstök tónlistarhátíð barna og unglinga í Silfurbergi þar sem yfir 300 börn koma fram.