mbl.is/Brynjar Gauti

Hæstiréttur hefur snúið við dómum Héraðsdóms Reykjavíkur í máli þriggja lóðarhafa gegn Reykjavíkurborg. Hæstiréttur komst að þeirri niðurstöðu að lóðarhöfunum sé ekki heimilt að skila borginni lóðum undir atvinnuhúsnæði.

Tveir lóðarhafar kröfðust viðurkenningr á rétti sínum til að skila lóðunum, sem Reykjavíkurborg hafði áður úthlutað til þeirra.

Héraðsdómur viðurkenndi rétt lóðarhafanna til að skila sínum lóðum samkvæmt tilkynningum og með því að falla frá rétti til að byggja á henni. Hæstiréttur sýknar hins vegar Reykjavíkurborg af kröfum lóðarhafanna.

Þriðji lóðarhafinn krafði borgina um endurgreiðslu á gatnagerðar- og byggingarréttargjöldum vegna lóðar undir atvinnuhúsnæði sem borgin hafði úthlutað til lóðarhafans en félagið hafði síðar reynt að skila aftur.

Í héraðsdómi var Reykjavíkurborg gert að greiða lóðarhafanum 93 milljónir kr. Hæstiréttur sneri dómnum hins vegar við og sýknar borgina.

Í dómi Hæstaréttar varðandi var vísað til þess að rétturinn hefði áður leyst úr hliðstæðu álitaefni varðandi skil á lóð frá Reykjavíkurborg með dómi.

Þar hefði lóðarhafi talið sig eiga einhliða rétt til að skila lóð og fá tiltekin gjöld endurgreidd og að leiða mætti þennan rétt af ákvæðum laga og skilmálum borgarinnar sem um lóðina giltu. Lóðarhafinn hefði einnig talið sig geta rift úthlutuninni með vísan til þess að lóðin hefði ekki þá eiginleika sem áskildir voru og að forsendur úthlutunarinnar hefðu brostið. Hann hefði loks vísað til þess að Reykjavíkurborg hefði ekki verið heimilt að víkja frá þeirri almennu reglu sem sveitarfélagið hafði áður fylgt að taka við atvinnuhúsalóðum sem lóðarhafar vildu skila og endurgreiða gjöld vegna þeirra.

Hæstiréttur taldi eins hátta til í máli lóðarhafanna og borgarinnar og að hvorki lægju fyrir önnur málsatvik né frekari upplýsingar um stjórnsýsluframkvæmd til þess að frá fordæminu yrði vikið. Var borgin því sýknuð af kröfunum.