ÁTVR hefur lengi framleitt neftóbak.

„Þarna erum við að tala um skro- og munntóbak og á meðan að neftóbak er markaðssett sem neftóbak þá á þetta ekki við um það,“ segir Þuríður Backman, þingmaður Vinstrihreyfingarinnar - græns framboðs og formaður heilbrigðisnefndar Alþingis.

Áfengis- og tóbaksverslun ríkisins (ÁTVR) segir í umsögn um nýtt frumvarp um tóbaksvaranir, að verði frumvarpið óbreytt að lögum yrði fyrirtækið að hætta að framleiða og selja íslenskt neftóbak en það tóbak er nú eina löglega reyklausa tóbakið sem selt er hér á landi.

Í samtali við mbl.is sagði Sigrún Ósk Sigurðardóttir, aðstoðarforstjóri ÁTVR, að óljóst væri hvað átt væri við með orðalagi um að banna ætti bragð- og lyktarblandað reyklaust tóbak. Þetta þyrfti að skilgreina eða að öðrum kosti undanskilja íslenska neftóbakið í þessum efnum. Þannig væri til að mynda salt í neftóbakinu og fleiri bragð- og lyktarefni.

Þuríður hafnar því að óljóst sé hvað átt sé við. Með orðalaginu sé verið að ræða um bragð- og lyktarefni sem sé ætlað að koma í stað bragðsins og lyktarinnar af tóbakinu sjálfu og ítrekar að frumvarpið eigi aðeins við um skro- og munntóbak en ekki neftóbak.

„En hitt er svo annað mál að heilbrigðisnefnd, eins og sem betur fer mjög margir í þjóðfélaginu, hefur áhyggjur af þeirri þróun sem er nú að eiga sér stað í íslensku þjóðfélagi hjá ungu fólki sem er að nota neftóbakið sem munntóbak og það þarf sannarlega að fara í átak til þess að stemma stigum við þeirri þróun,“ segir Þuríður.

Alþingismennirnir Þuríður Backman og Atli Gíslason. mbl.is / Ómar Óskarsson