mbl.is/Ómar

Stofnanir ársins 2011, að mati starfsmanna á almennum og opinberum vinnumarkaði, eru embætti sérstaks saksóknara og sýslumannsins í Vík. Fjölbrautaskóli Snæfellinga er hástökkvari ársins.

Val á stofnun ársins og fyrirtæki ársins er samvinnuverkefni SFR stéttarfélags í almannaþjónustu og VR en þetta er í sjötta sinn sem SFR velur stofnun ársins. 
 
Embætti sérstaks saksóknara var efstt í flokki stærri stofnana (50 starfsmenn og fl.) og fékk einkunnina 4,40, af 5 mögulegum, en sýslumaðurinn í Vík var efstur í flokki minni stofnana (undir 50 starfsmenn) með einkunnina 4,79. Fjölbrautaskóli Snæfellinga bætir sig mest á milli ára. Hann var í neðsta sæti á lista minni stofnana sem komust á blað í fyrra en er nú í 19 sæti af 85.
 
SFR segir, að þegar á heildina sé litið komi í ljós að aðeins drafi úr ánægju starfsmanna á vinnustöðum, sérstaklega á stærri stofnunum en fylgni sé milli starfsánægju og stærðar stofnana.

Starfsfólk á minni stofnunum sé almennt ánægðara en á þeim stærri.  Starf og staða starfsmanns innan stofnunar skipti einnig máli en stjórnendur og starfsfólk með mannaforráð sé ánægðara í starfi en aðrir starfsmenn.
 
Þá sýni niðurstöður könnunarinnar, að vaxandi óánægja sé með launakjör, en ánægja með launakjör hafi nú minnkað tvö ár í röð. Í ár eru um 60% starfsmanna óánægðir með launakjör sín.  Í fyrra voru það 51% og árið 2009 voru þeir 44%.