Höfn í Hornafirði. www.mats.is

Héraðsdómur Austurlands hefur dæmt 28 ára gamlan karlmann í 9 mánaða óskilorðsbundið fangelsi fyrir þjófnað og fyrir að hóta lögreglumönnum á Höfn í Hornafirði lífláti og líkamsmeiðingum í október á síðasta ári.

Þetta er í þriðja skipti, sem maðurinn er dæmdur fyrir brot gegn valdstjórninni og hann hefur einnig ítrekað verið dæmdur fyrir auðgunarbrot og líkamsárásir.

Fram kemur í dómnum, að maðurinn sagðist ekkert muna eftir atburðum. Hann sagðist ekkert eiga sökótt við umrædda lögreglumenn og hafa átt góð samskipti við þá í gegnum tíðina, þótt þeir hafi oft þurft að hafa afskipti af honum. Þá myndi hann aldrei standa við hótanir af því tagi sem honum væru gefnar að sök.

Hljóðupptaka var til af samskiptum mannsins og lögreglumanna í lögreglustöðinni á Höfn. Í dómnum segir, að á hljóðrituninni sé ekki  alltaf hægt að greina orðaskil, en af henni megi skýrt heyra að maðurinn hafi verið í eins konar sturlunarástandi eins og lögreglan lýsti, öskrandi, hrækjandi og viðhafandi formælingar. Þá heyrist hann segja: „ég veit hvar þú átt heima helvítið þitt“, en auk þess heyrist snemma á upptökunni að hann viðhafði orðin „ég sprengi ykkur“.

Tveir lögreglumenn báru einnig að maðurinn hefði ítrekað, bæði fyrir utan lögreglustöðina og inni í fangaklefa, hótað þeim báðum lífláti og barsmíðum. Taldi dómurinn sök mannsins sannaða og dæmdi hann í 9 mánaða fangelsi, sem ekki var talin ástæða til að skilorðsbinda.