Mótmælendur ræða við lögreglumenn við Kárahnjúka sumarið 2005. mbl.is/Árni Torfason

Embætti lögreglustjórans á  Seyðisfirði segir, að starfsmenn embættisins hafi aldrei haft nein samskipti við breska lögreglumanninn Mark Kennedy, sem kom hingað til lands árið 2005 undir því yfirskini að hann væri aðgerðasinni.

Í tilkynningu segist embættið ítreka, að það hafi aldrei haft nein samskipti við Kennedy.

„Að gefnu tilefni vill embætti lögreglustjórans á Seyðisfirði taka eftirfarandi fram vegna myndbirtingar af handtöku manns við Kárahnjúka sumarið 2005 á heimasíðu Saving Iceland, og fullyrt að sé Mark Kennedy (Stone): Vefritið Smugan hefur sett þetta fram sem sannleika en aldrei haft samband við embættið til að fá skoðun þess á því hver sé á þessari mynd.  DV gerði það hins vegar og gat svara embættisins við því hvort um Mark væri að ræða á umræddri mynd. Eftir skoðun hjá embættinu á myndinni er ljóst að hér er ekki um Mark Kennedy (Stone) að ræða heldur annan mann. Lögreglunni er ljóst hver sá maður er og þurfti að hafa afskipti af honum nokkrum sinnum meðan á framkvæmdum stóð við Kárahnjúka," segir í yfirlýsingu lögreglunnar á Seyðisfirði.