Klippt á borða í flugstöðinni á Duelles-flugvelli í Washington. Össur Skarphéðinsson og Birkir Hólm Guðnason fengu aðstoð frá fulltrúum flugvallarins og borgarinnar. mbl.is/Björn Jóhann

Björn Jóhann Björnsson í Washington bjb@mbl.is

Boeing-þota Icelandair, Eyjafjallajökull, lenti á Dulles-flugvelli í Washington í gærkvöldi í fyrsta áætlunarflugi félagsins til höfuðborgar Bandaríkjanna. Við athöfn af þessu tilefni klippti Össur Skarphéðinsson utanríkisráðherra á borða í flugstöðinni, með aðstoð Birkis Hólm Guðnasonar, forstjóra Icelandair, og fulltrúum flugvallarins og Washingtonborgar.

Líkt og venja er í fyrsta áætlunarflugi flugfélagana biðu slökkvibílar eftir vél Icelandair og sprautuðu yfir hana vatni er hún lagði að flugstöðinni. Fjöldi Íslendinga var viðstaddur athöfnina á flugvellinum, m.a. Hjálmar W. Hannesson, sendiherra Íslands í Washington, embættismenn í sendiráðinu og starfsmenn Icelandair í Bandaríkjunum, auk þeirra farþega sem höfðu pantað sér far til Íslands í fyrstu ferðinni.

Fulltrúar flugvallarins og Washington-borgar lýstu í ræðum sínum mikilli ánægju sinni yfir áætlunarflugi Icelandair. Fram kom m.a. að þetta er 25. leiðin sem er í boði á vellinum milli tveggja höfuðborga. Fulltrúi Washington-borgar, Charles Wilson, rifjaði upp í sinni ræðu er hann keypti flugmiða í brúðkaupsferð handa sinni heittelskuðu fyrir 63 árum. Hann sagðist á þeim tíma ekki hafa mikil fjárráð og ákveðið að velja ódýrustu flugleiðina. Fyrir valinu varð Ísland, og flugu þau með Loftleiðum frá New York, með viðkomu í Goose Bay og á Grænlandi. Sagði hann Íslandsferðina hafa verið ógleymanlega og hjónabandið heldur enn í dag!

Össur Skarphéðinsson fagnaði í ræðu sinni þessum áfanga í sögu Icelandair. Félagið væri orðið með þeim reynslumeiri í flugheiminum í dag og líkt og stjörnurnar og tunglið, þá væri félagið alltaf á áætlun. Vitnaði Össur til þess að fjölmargir Íslendingar hefðu sótt Bandaríkin heim, einn af þeim væri víkingurinn og landkönnuðurinn Leifur Eiríksson. Hann hefði að vísu yfirgefið Bandaríkin en Icelandair ætlaði ekki að feta í hans fótspor.

„Icelandair ætlar ekki að yfirgefa ykkur hérna í Washington. Félagið ætlar að koma hingað fjórum sinnum í hverri viku," sagði Össur og uppskar mikinn hlátur viðstaddra.

Framlengja flugið til Washington 

Icelandair tilkynnti jafnframt í gær að áætlun félagsins til Washington hefði verið framlengd til út árið 2011 og bætt við 70 flugum yfir haust- og vetrarmánuðina. Upphaflega var áætlað að fljúga til og frá Washington í sumar frá 17. maí til 13. september en í apríl tilkynnti Icelandair um framlengingu flugsins um rúman mánuð og jafnframt var flugum fjölgað úr fjórum á viku í fimm flug á viku í júlí og ágúst í sumar. Nú hefur semsagt verið ákveðið að Washingtonflugið verði fjórum sinnum í viku til 8. janúar 2012 og hefjist síðan aftur af krafti þann 27. mars á næsta ári.

Washington er áttunda borgin sem Icelandair flýgur áætlunarflug til í Norður Ameríku. Hinar borgirnar eru New York, Boston, Seattle, Minneapolis og Orlando í Bandaríkjunum, og Toronto og Halifax í Kanada. Í sumar flýgur Icelandair 53 flug vikulega til Norður Ameríku, mun fleiri en önnur flugfélög á Norðurlöndum, að því er segir í tilkynningu frá Icelandair.

Leikinn var léttur djass að hætti Washington á Dulles-flugvellinum. mbl.is/Björn Jóhann

Slökkvibílar biðu eftir vél Icelandair, Eyjafjallajökli, og sprautuðu yfir hana í fyrsta áætlunarfluginu. mbl.is/Björn Jóhann