Gosmökkurinn á gervihnattamynd. Reuters

Gosmökkurinn frá eldgosinu í Grímsvötnum nær ekki í 5 km hæð. Að sögn jarðvísindamanna sést mökkurinn ekki fyrir ofan ský í 5-7 km hæð yfir Vatnajökli.

Fram kemur í stöðuskýrslu Veðurstofunnar og Jarðvísindastofnunar, að  gosmökkurinn hafi farið í 8 km kl. 14 í dag en lækkað fljótt aftur. Breytingar á hæð gosmakkar, öskufalli í byggð, fjölda eldinga, skjálftaóróa og jarðskorpuhreyfingar bendi til þess að áfram dragi úr eldgosinu og sprengivirkni nú sé aðeins lítið brot af því sem var í upphafi.

Haft er eftir flugmönnum, sem hafa farið yfir svæðið, að mökkurinn sé í um það bil 10 þúsund fetum og sé að mestu ljós en fari upp í 15 þúsund fet (3-5 km) og dökkni þá um leið.

Áætlað kvikuflæði út frá hæð gosmakkar jafngildir um 10-70 tonnum á sekúndu af gjósku. Ský hylja allstóran hluta Vatnajökuls og því er erfitt að greina gosmökk þar á gervitunglamyndum. Sunnan Íslands sést öskuslæða í suður og suðaustur, yfir 800 km frá gosstöðvunum.

Samkvæmt viðtölum við veðurathugunarfólk liggur dökkur og vel afmarkaður öskumökkur milli Lómagnúps og Mýrdalsjökuls að Hjörleifshöfða. Mökkurinn er ekki mjög þykkur og er fjúkandi aska á bland.

Á Kirkjubæjarklaustri hefur öskufall minnkað frá því í gær. Skyggnið í morgun náði 200 metrum og mögulegt var að vera úti án hlífðargleraugna. Hins vegar dimmdi yfir aftur undir hádegið og skyggni minnkaði í um 100 metra.

Til stóð að flugvél Landhelgisgæslunnar færi í eftirlitsflug yfir gosstöðvarnar í dag, en því hefur verið frestað til morguns.