„Undirbúningsvinna að verkefninu fór fram á vordögum 2008. Strax í upphafi voru margir aðilar kallaðir til frá öllum skólastigum, íþrótta- og tómstundageiranum og foreldrafélögum. Í upphafi var þeirri spurningu varpað fram hvernig við gætum staðið saman í að koma í veg fyrir vinaleysi barna og unglinga,“ segir Hanna Dóra Björnsdóttir, formaður vinateymis í Vinaverkefninu í Skagafirði en það fékk í gær foreldraverðlaun Heimilis og skóla – landssamtaka foreldra árið 2011.

„Það komu fram margar hugmyndir um útfærslu. Niðurstaðan var svokallað vinateymi. Það fundar mánaðarlega eða hér um bil. Þar er frjór jarðvegur fyrir skoðanaskipti og þar er ýtt undir samstarf foreldra. Við leggjum áherslu á forvarnir og vinnum einnig eftir viðbragðsáætlun en samkvæmt henni geta foreldrar leitað til vinateymis.“

Ráðherra afhenti verðlaunin

Katrín Jakobsdóttir, mennta- og menningarmálaráðherra, afhenti Foreldraverðlaunin en þau voru veitt í sextánda sinn. Þá voru veitt ein hvatningarverðlaun en þau hlaut Foreldrafélagið Örkin hans Nóa, leikskólanum Nóaborg, fyrir „framúrskarandi gott foreldrasamstarf“. Dugnaðarforkaverðlaun 2011 voru veitt Þórólfi Sigjónssyni og Guðnýju Vésteinsdóttur, „foreldrum barna í Hallormsstaðarskóla, fyrir sjálfboðaliðastarf á tímum fjárskorts, og öfluga og virka þátttöku foreldra í skólastarfinu“.