Frá fundi í borgarstjórn Reykjavíkur. mbl.is/Ernir Eyjólfsson

Meirihlutinn í borgarstjórn Reykjavíkur hafnaði í dag tillögu frá borgarfulltrúum Sjálfstæðisflokksins um að rekstrarafgangur Reykjavíkurborgar yrði notaður til þess meðal annars að draga til baka hækkanir á útsvari og umdeildar skólasameiningar. Þetta kemur fram í fréttatilkynningu frá borgarstjórnarflokki sjálfstæðismanna.

Lögðu sjálfstæðismenn til að núgildandi fjárhagsáætlun Reykjavíkurborgar yrði endurskoðuð í ljósi rekstrarafgangs borgarsjóðs upp á 1.472 milljónir króna.

„Lagt var til að það yrði gert með því að draga til baka hækkanir á útsvari borgarbúa og hverfa frá áformum um umdeildar skólasameiningar. Borgarfulltrúar Sjálfstæðisflokksins bentu á að slíkar breytingar myndu hafa víðtæk áhrif fyrir borgarbúa, en myndi einungis draga úr afgangi borgarsjóðs um tæpan þriðjung þar sem kostnaður vegna þessara tillagna yrði lægri um 400 milljónir og enn eftir stæði rúmlega milljarður í afgang,“ eins og segir í tilkynningunni.
 
Hanna Birna Kristjánsdóttir, oddviti sjálfstæðismanna í Reykjavík, sagði á fundi borgarstjórnar í dag að með því að hafna tillögu sjálfstæðismanna hefði meirihlutinn í borgarstjórn „eina ferðina enn gerst sekur um að forgangsraða í þágu kerfisins en ekki fólksins.“

Tillaga borgarstjórnarflokks Sjálfstæðisflokksins:

„Borgarstjórn telur mikilvægt að rekstrarafgangur síðasta árs verði nýttur beint í þágu íbúa borgarinnar. Með það að markmiði samþykkir borgarstjórn að hafin verði vinna við endurskoðun gildandi fjárhagsáætlunar, annars vegar þannig að fyrirhugaðar útsvarshækkanir verði dregnar til baka og hins vegar þannig að fyrirhugaðar skólasameiningar verði endurskoðaðar og taki ekki gildi á þessu ári. Kostnaður vegna þessara breytinga á fjárhagsáætlun 2011 myndi verða um helmingur þess tekjuauka sem áætlaður var með hækkun á útsvarshlutfalli, ásamt þeim sparnaði sem skólasameiningar skyldu tryggja á árinu. Kostnaður vegna þessara breytinga á gildandi fjárhagsáætlun yrði þannig aldrei meiri en sem nemur 400-500 milljónum (ræðst af því hvenær á árinu skattalækkun tekur gildi) sem er einungis um þriðjungur þess rekstrarafgangs sem ársreikningur staðfestir. Borgarstjórn telur því fjármagni vel varið til að standa vörð um hag, kjör og velferð borgarbúa.“