Börn á bæ skammt frá Kirkjubæjarklaustri í gær. Reuters

Eitt barn mætti í leikskólann á Kirkjubæjarklaustri í gær þegar hann var opnaður, en mörg börn voru flutt úr bænum eftir að öskufall hófst úr Grímsvatnagosinu. Eygló Kristjánsdóttir sveitarstjóri segist eiga von á að þau komi til baka um helgina. Grunnskólinn á Klaustri verður ekki opnaður fyrr en eftir helgi.

23 börn eru í leikskólanum á Klaustri. Búið er að þrífa skólann, en talsverð aska hafði borist inn í hann. Í dag verður haldið áfram að þrífa grunnskólann og íþróttamiðstöðina.

Eygló sagði að fyrirtæki í ferðaþjónustu á Klaustri og í nágrenni væru tilbúin til að taka á móti ferðamönnum og hún hvetur þá sem vilja heimsækja Klaustur um helgina til að vera óhræddir við að koma. Það væri hins vegar varasamt fyrir ferðamenn að fara upp á jökul. Magnús Tumi Guðmundsson jarðeðlisfræðingur hefði á íbúafundi í gærkvöldi varað fólk við því að fara nálægt eldstöðinni vegna sprengjuhættu frá gosinu.

Hreinsunarstarf á Klaustri heldur áfram í dag. Slökkvibílar halda áfram að þvo hús og umhverfi húsa. Eygló sagði að allar brunatryggðar eignir í sveitarfélaginu yrðu skolaðar. Hún sagði þetta mikið verk. 66 sveitabæir væru í sveitarfélaginu og til viðbótar væri fjöldi sumarhúsa. Hún reiknar með að þessu verkefni ljúkii að mestu í dag.

Áfram hefur rignt á Klaustri í dag og sagði Eygló að rigningin væri kærkomin.