Sundlaugin á Kirkjubæjarklaustri þrifin mbl.is/Sigurgeir Sigurðsson

Stefnt er á að opna grunnskólann á Kirkjubæjarklaustri eftir helgi og sundlaugina sömuleiðis. Félagar úr Hjálparsveit skáta í Garðabæ mokuðu upp úr lauginni í gær og fóru hjólbörurnar í röðum þaðan upp, kúffullar af ösku. Um hundrað manns voru við hreinsunarstörf í Skaftárhreppi í gær.

Um hundrað manns voru við hreinsunarstörf í Skaftárhreppi í gær, fyrir utan heimamenn sjálfa. Liðsaukinn var kærkominn og hvarvetna glaðvært fólk á þönum við að kippa hlutunum í liðinn eftir öskufallið í byrjun vikunnar. „Þetta er algjör draumastaða,“ sagði Eygló Kristjánsdóttir sveitarstjóri í gær, þegar hreinsunin stóð sem hæst og í þokkabót var farið að ganga á með rigningarskúrum, svo askan skolaðist enn frekar niður. Mikinn meðbyr og velvilja væri að finna frá þeim sem vildu hjálpa til.

Átta slökkviliðsbílar frá sjö embættum fóru um Meðalland, Kirkjubæjarklaustur, Síðu og Fljótshverfi til að þvo hús að utan. Björgunarsveitir frá höfuðborgarsvæðinu, Akranesi og úr Árnessýslu tóku einnig til hendinni og hópar sjálfboðaliða, meðal annars frá iðnaðarráðuneytinu og KPMG, þrifu hús á Klaustri að innan.

Unnið að hreinsun á Klaustri í gær mbl.is/Sigurgeir Sigurðsson