mbl.is/Eggert

Mikill erill var hjá lögreglu í nótt. Átta gista fangageymslur vegna ýmissa brota, nokkrir vegna ölvunaraksturs. Tveir þeirra óku á fólk í miðborginni, annar á stúlku á Laugavegi og hinn utan í hóp fólks í Bankastræti með þeim afleiðingum að einn slasaðist.

Lögreglan hafði afskipti af níu ökumönnum sem óku undir áhrifum á höfuðborgarsvæðinu í nótt, sem er í hærra lagi.

Hún segir að um miðnættið hafi ökumaður ekið á stúlku á Laugavegi við Smiðjustíg. Ökumaðurinn var grunaður um ölvun við akstur og var handtekinn. Ekki liggur fyrir hvort stúlkan hafi slasast mikið.

Á þriðja tímanum í nótt ók ölvaður ökumaður utan í hóp fólks í Bankastræti. Einn slasaðist og var fluttur á slysadeild. En að sögn lögreglu var ekið yfir ristina á viðkomandi. Ökumaðurinn stakk af. 

Hann sneri hins vegar aftur nokkrum mínútum síðar, en þá voru lögreglumenn að sinna öðru verkefni í Bankastrætinu. Þá réðist æstur hópurinn á bílinn og skemmdi hann. Lögreglumenn urðu að skakka leikinn og handtóku þeir ökumanninn eftir nokkur átök.

Hitt verkefnið sem lögreglan var að sinna í Bankastrætinu tengist slysi. Að sögn varðstjóra skall stúlka í götuna með andlitið þegar hún var að reyna að klifra upp á pallbíl sem ók svo af stað. Stúlkan vankaðist við höggið og var flutt á slysadeild.

Þá varð útafakstur á Elliðavatnsvegi við Vífilsstaðavatn um 2:30 í nótt. Ökumaður var einnig grunaður um ölvun við akstur.

Um eittleytið í nótt varð slys í Kópavogi þegar leigubifreið ók af stað áður en farþeginn var almennilega kominn inn í bifreiðina. Við það féll farþeginn.

Handtekinn vopnaður piparúða og kjöthamri

Lögreglan handtók mann á fimmta tímanum í nótt, sem hafði verið meinaður aðgangur að veitingastað í miðborginni. Maðurinn var ekki sáttur við dyravörðinn og fór því heim til að sækja piparúða og kjöthamar. Þegar hann sneri aftur á veitingastaðinn úðaði hann úr piparúðanum á dyravörðinn. Lögreglan var kölluð á staðinn og handtók hún árásarmanninn, sem beitti ekki hamrinum. Voru aðrir dyraverðir búnir að yfirbuga manninn þegar hún kom.

Þá var tilkynnt um slagsmál á poolstofu í Reykjavík um 1:30 í nótt.