Flokksstjórnarfundur Samfylkingarinnar var haldinn í Fjölbrautaskóla Garðabæjar um helgina. mbl.is/Kristinn

Samtök ferðaþjónustunnar segja, að það hafi vakið athygli þeirra fyrirtækja, sem leigja út ráðstefnusali, að stjórnmálaflokkar hafa að undanförnu haldið flokksþing sín í skólastofnunum og þurfi því ekki að greiða virðisaukaskatt af húsaleigunni.

Segja samtökin, að Vinstri grænir hafi á síðasta ári haldið tvo fundi í Hagaskóla. Samtök ferðaþjónustunnar hafi sent bréf til Hagaskóla og spurt um lögboðið starfsleyfi og greiðslu virðisaukaskatts. Þessu erindi hafi verið vísað til borgarlögmanns, sem hafi ekki enn svarað því.

Þá hafi Samfylkingin haldið flokksstjórnarfund um síðustu helgi í Fjölbrautaskóla Garðabæjar.  Þar sé starfsleyfi til staðar en sökum fárra funda á ári falli skólinn undir undanþágu frá virðisaukaskatti.

Þá fari fram umfangsmikill ráðstefnurekstur í Háskóla Íslands og ekki allur á vegum HÍ.  Þar sé virðisaukaskattur ekki innheimtur.

„Til þess að leigja út ráðstefnusal þarf starfsleyfi skv. lögum um veitingastaði, gististaði og skemmtanahald auk þess sem greiða þarf 25.5% virðisaukaskatt af leigunni, sem er hæsti virðisaukaskattur í heimi. Það ríkir gríðarleg samkeppni á þessum markaði og fyrir löghlýðin fyrirtæki er erfitt að eiga í samkeppni við opinberar stofnanir sem þurfa ekki að standa skil á svo háum skatti.   að er ömurleg staða að stjórnmálaflokkarnir skuli vera búnir að skattleggja fyrirtækin svo harkalega að þeir verði sjálfir að forðast þjónustu þeirra," segja Samtök ferðaþjónustunnar.