Við upphaf rannsóknanna í maí. Þá komu í ljós garður og diskabrot í túninu við Landspítalann.

Bæjarhús Grænuborgar fundust ekki í forkönnun Fornleifaverndar ríkisins vegna fyrirhugaðra framkvæmda á Landspítalalóðinni sem fram fór á dögunum á túninu fyrir framan gamla spítalann. Telur Fornleifavernd að ráðast verði í frekari rannsóknir á svæðinu.

Á framkvæmdavef Landspítala er vísað í svar Fornleifaverndar ríkisins til framkvæmdastjóra Nýrs Landspítala ohf., að þrátt fyrir að óvenju stór svæði hafi verið opnuð, miðað við að um forkönnun var að ræða, hafi bæjarhús Grænuborgar ekki fundist og ekki hafi tekist að staðfesta að býlið hafi staðið þar sem líkur þóttu benda til, þ.e. vestast í túninu framan við gömlu spítalabygginguna sem reist var á árunum 1925-1930.

Í forkönnuninni komu hins vegar í ljós leifar mannvirkis, steinhleðslur, í suðvesturhorni túnsins sem mögulega tengjast búsetu í Grænuborg og telur Forleifavernd óhjákvæmilegt að ráðast í frekari rannsóknir á svæðinu og fylgja steinhleðslunum sem fundust í forkönnuninni til að fá gleggri mynd af þeim mannvirkjum sem þær tilheyra.

Þá telur Fornleifavernd að grafa þurfi prufuholur með jöfnu millibili á túninu vestanverðu til að fá fullvissu um það hvort bæjarhús Grænuborgar liggi á milli þeirra svæða sem skoðuð voru í forkönnuninni, sem og hvort önnur merki mannvistar leynist þar undir yfirborði. Komi slíkt í ljós er það álit stofnunarinnar að rannsaka þurfi það að fullu.