Margrét Tryggvadóttir og Lilja Mósesdóttir Ómar Óskarsson

Margrét Tryggvadóttir þingmaður Hreyfingarinnar spurði í umræðum um skýrslu fjármálaráðherra um endurreisn bankanna að íslensk stjórnvöld hefðu tekið hagsmuni kröfuhafa í einu og öllu fram fyrir hagsmuni venjulegra Íslendinga

Má segja að það hafi verið meginstefið í gagnrýni þingmanna allra stjórnarandstöðuflokka á Alþingi í dag, að hagsmunir kröfuhafa bankanna hafi verið teknir fram fyrir hagsmuni íslensks almennings.

„Venjulegt fólk er upp til hópa tæknilega gjaldþrota," sagði Margrét. „Þegar hyllir í réttlæti hjá dómstólum er leikreglum breytt með lagabreytignum til að tefja fyrir réttlátri niðurstöðu."

Sagðist hún ekki trúa því að eldveggir á milli kröfuhafa og stjórna bankanna hefðu neina þýðingu, ekki frekar en eldveggir innan banka fyrir hrun. Eignir hafi verið færðar gömlu bönkunum með gífurlegum afslætti en nýju bankarnir reynt að innheimta þær að fullu og blóðmjólka fólk.

„Hagnaður bankanna er til kominn vegna þess að verið er að eignfæra afsláttinn," sagði Margrét. Afslátturinn ætti greinilega ekki að ganga áfram til skuldara. „Venjulegt fólk hefur verið rænt afrakstri ævistarfsins. Ég velti því fyrir mér hvort sá sem ber ábyrgð á því hvernig bankarnir voru endurreistir og færðir í hendur kröfuhafa þurfi ekki að svara fyrir það fyrir dómstólum?" spurði Margrét.

Skjaldborgin til ævarandi skammar

Lilja Mósesdóttir, utan þingflokka,  sagði ríkisstjórnina hafa reist skjaldborg um kröfuhafa, en ekki heimili og fyrirtæki. Það yrði vinstristjórninni til ævarandi skammar.

Sagði hún það óskiljanlega ákvörðun að gengið hefði verið til samninga við kröfuhafa áður en óháð mat á verðmæti eignasafna bankanna hafi verið tilbúið. Reynt hafi verið að hámarka heimtur fyrir Breta og Hollendinga vegna Icesave til að greiða fyrir ESB-aðildarumsókninni.

Nú sé líka komið í ljós að kostnaður við endurreisnina hafi verið um 400 milljarðar, en ekki 185.

Sjálfstæðisflokkur ætlaði að setja 400 milljarða í bankana

Björn Valur Gíslason, þingmaður VG, svaraði því til að hann skildi ekki hvað þingmenn væru að fara. Stefna Sjálfstæðisflokksins fram að og fram yfir hrun í efnahagsmálum hefði ekki farið saman við hagsmuni íslensks almennings.

„Því hefur verið haldið fram að ríkisstjórn Geirs Hilmars Haarde hafi verið með stórkostlega áætlun, eitthvert svakalegt plan til að bjarga íslenskum heimilum við endurreisn bankanna," sagði Björn Valur.

Það væri sama ríkisstjórn og fékk AGS til landsins. Vitnaði hann svo í skýrslu frá AGS um endurreisn bankanna.

„Hvert var stóra planið, sem breytt var frá þegar ný ríkisstjórn tók við? Jú, áætlunin var sú að veita hátt í 400 milljörðum króna frá íslenskum skattgreiðendum inn í bankakerfið, ríflega 20% af VLF inn í bankakerfið. Það var stóra planið, sem rætt var um í skýrslu Alþjóðagjaldeyrissjóðsins."