Yfirheyrslur í tengslum við rannsókn embættis sérstaks saksóknara á lánveitingum Vátryggingafélags Íslands (VÍS) hafa staðið yfir í allan dag. Í gær var innan við tugur yfirheyrður en fleiri bættust í þann hóp í dag. „Þetta er alltaf óvissuferð,“ segir sérstakur saksóknari um rannsóknir embættisins.

Embættið framkvæmdi húsleit í höfuðstöðvum VÍS í gær en engar húsleitir hafa verið gerðar í dag.

Ólafur Þór Hauksson, sérstakur saksóknari, segir í samtali við mbl.is að hann geti lítið tjá sig um gang rannsóknarinnar sem sé á frumstigi. Aðspurður segir hann að um mörg tilvik sé að ræða og því sé að mörgu að hyggja við rannsókn málsins.

Yfirheyrslur hafa staðið yfir í allan dag en óljóst er á þessari stundu hvenær þeim muni ljúka. Ólafur segir að menn taki sér þann tíma sem þeir þurfi.

Sem fyrr segir var gerð húsleit í höfuðstöðvum VÍS og á öðrum stað á höfuðborgarsvæðinu í gær. Þá var hópur manna, innan við tugur, yfirheyrður í gær, ýmist sem vitni eða grunaðir í málinu. Ólafur segir að fleiri hafi bæst við í dag en vill hins vegar ekki greina frá fjöldanum.

Meðal þeirra sem voru handteknir og yfirheyrðir í gær eru, samkvæmt heimildum Morgunblaðsins, Lýður Guðmundsson, fyrrverandi stjórnarformaður og einn af aðaleigendum Exista, móðurfélags VÍS, Erlendur Hjaltason, fyrrverandi forstjóri Exista, sem einnig sat í stjórn VÍS, og Guðmundur Örn Gunnarsson, fyrrverandi forstjóri fyrirtækisins. 

Sérstakur saksóknari rannsakar meðal annars fjölda lánveitinga VÍS til ýmissa félaga og aðila á árunum 2007 til 2009. Fjármálaeftirlitið kærði málið til saksóknara að lokinni eigin athugun. Fram hefur komið að lánveitingarnar voru meðal annars til eigenda og starfsmanna VÍS. Guðmundur Örn Gunnarsson, sem var forstjóri VÍS frá 2008, lét af störfum í síðustu viku í kjölfar úttektar Fjármálaeftirlitsins.

Grunur er um brot á auðgunarbrotakafla hegningarlaga við ráðstöfun á fjármunum tryggingafélagsins og brot á lögum um vátryggingastarfsemi. Ólafur hefur sagt að um verulega fjárhagslega hagsmuni sé að tefla, þeir hlaupi á milljörðum, og fjölda tilvika.