Laxveiðitímabilið hefst á sunnudaginn kemur en þá byrja veiðimenn að kasta agni sínu í Norðurá í Borgarfirði, í Straumana, ármót Norðurár og Hvítár, og á neðsta svæði Blöndu.

Eins og undanfarin ár er Þórarinn Sigþórsson tannlæknir einn veiðimannanna sem opna Blöndu. Han er bjartsýnn hvað laxveiðina í sumar varðar.

„Ég stend í þeirri trú að þetta eigi eftir að verða gott sumar,“ segir Þórarinn. Hann segir að svo virðist sem sjórinn hafi tekið vel við seiðunum og vísbendingar, eins og ágæt loðnuveiði, gefi til kynna að nánasta framtíð laxveiðimanna sé björt. Hann er líka spenntur að hefja veiðar í Blöndu á sunnudaginn.

Bernhard A. Petersen, gjaldkeri Stangaveiðifélags Reykjavíkur, opnar Norðurá ásamt öðrum stjórnarmönnum félagsins.

„Þetta verður talsvert annað en í fyrra, þegar við byrjuðum í ánni mjög vatnslítilli og í hlýindum,“ segir hann en Norðurá er nú bæði vatnsmikil og svolítið skoluð. „Almennt séð líst mér vel á opnunina, þetta er fallegt vorvatn og maður heyrir að laxinn er að skila sér hér og þar í árnar eins og hefðbundið er. Svo er stórstreymt núna fyrir helgina. Ég held líka að júníveiðin gæti orðið góð,“ segir Bernharð.