Arnar Sigurmundsson, formaður Landsamtaka lífeyrissjóða. Golli / Kjartan Þorbjörnsson

„Við trúum því ekki fyrr en við tökum á því að það sé meiningin að skattleggja lífeyrissjóðina,“ segir Arnar Sigurmundsson, formaður Landsamtaka lífeyrissjóða um fyrirhugaða skattlagningu á lífeyrissjóði landsins.

„Við vorum tilbúnir til að standa við það loforð sem kemur fram í viljayfirlýsingunni um að fjármagna okkar hlut vegna almennu vaxtaniðurgreiðslunnar. Sjóðfélagarnir borga sína skatta og gjöld þegar lífeyririnn er innheimtur, er það ekki nóg?“

Meirihluti efnahags- og skattanefndar Alþingis hefur brugðist við gagnrýni á fyrirhugaða skattlagningu lífeyrissjóða og fjármálafyrirtækja með því að leggja til breytingar á gildistöku hennar. Jafnframt verði hlutdeild sjóðanna í heildarkostnaðinum lækkuð í 40% (um 1,4 milljarðar) en hlutur fjármálafyrirtækjanna hækki samsvarandi.

Arnar segir að forsvarsmenn lífeyrissjóðanna hafi ekki átt von á þessum viðbrögðum ríkisvaldsins. „Það kom okkur á óvart hvað ríkið var skyndilega orðið óþolinmótt. Það höfðu verið viðræður í gangi, en allt í einu sagðist ríkið ekki geta beðið lengur. Það er auðvitað best að geta klárað þetta með frjálsum samningum og ég trúi ekki öðru en að það verði niðurstaðan að lokum.“

Arnar segir að lífeyrissjóðirnir geti fremur lítið að gert varðandi þessar skattatillögur. „Við vitum að allir bakhjarlar lífeyrissjóðanna leggjast mjög gegn þessu. Við óttumst að ef farið er að skattleggja í eitt skipti, þá muni það halda áfram. Við vonumst til að ná lendingu í málinu án þess að til skattlagningar komi.“