Nýjar tillögur um trúmál
Hallgrímskirkja mbl.is
Endurskoðuð tillaga um skólastarf og trúar- og lífsskoðunarmál var afgreidd til borgarráðs á fundi mannréttindaráðs Reykjavíkurborgar í hádeginu í dag. Upphaflegu tillögurnar sem lagðar voru fram síðastliðið í haust voru umdeildar og sagði Karl Sigurbjörnsson, biskup Íslands, þær meðal annars „vega að trú, siðum og hefðum“.
Margrét Sverrisdóttir, formaður mannréttindaráðs, segir ýmsar breytingar hafa verið gerðar á tillögunum. „Við sendum tillögurnar til fagráða borgarinnar síðastliðið haust og höfum verið að bíða eftir umsögnum frá þeim. Við tókum fullt tillit til athugasemda og höfum tekið af öll tvímæli í þessum breyttu tillögum um að ætlunin var ekki að hætta með jólasöngva og helgileiki.“
Ekki ætlunin að breyta námsskrá
Margrét segir ennfremur rétt að ítreka að aldrei hafi ætlunin verið að breyta námsskrá í kristnum fræðum eða kennslu í þeim. „Ýmsir reyndu að snúa þessu þannig að tillögurnar fælu í sér atlögu að kristinni trú. Það var alrangt og í tillögunum er kveðið á um heimsóknir í kirkjur og á helgistaði trúarfélaga og jafnframt heimsóknir frá fulltrúum trúar- og lífsskoðunarhópa í skóla. Slíkar heimsóknir eru liður í trúarbragðafræðslu. Hugsunin var aðeins að takmarka boðun trúar- og lífsskoðunarfélaga á skólatíma.“
Hún bætir við að tillögurnar séu hugsaðar til reynslu í skólum í Reykjavík í tvö ár frá og með næsta skólaári. „Þessar tillögur hafa verið endurbættar með því að taka fullt tillit til athugasemda og umsagna fagráða og við höfum leitast við að skýra og bæta við þær ákvæðum um að það er og var aldrei hugsunin að banna litlu-jólin eða aðrar hefðir sem tengjast skemmtunum í skólum.“
Í tillögunum er lagt til að trúar- og lífsskoðunarfélögum verði bannað að stunda starfsemi innan veggja skólastofnana og ennfremur verði lagt bann við því að dreifa „boðandi“ efni. „Foreldrum verða hins vegar áfram kynntir hvers kyns möguleikar í æskulýðsstarfi og þar á meðal á vegum kirkjunnar,“ segir Margrét.
Hún segir ennfremur að tillögurnar hafi fengið góð viðbrögð í skólasamfélaginu. „Okkur lá ekkert á og tókum okkur tíma í að fara yfir allar athugasemdir og tillögurnar hafa batnað með þessari málsmeðferð.“
Margrét Sverrisdóttir, formaður mannréttindaráðs Reykjavíkur. mbl.is
