Signý Jóhannesdóttir, varaforseti ASÍ. mbl.is/Kristinn

Fulltrúar Alþýðusambands Íslands voru á meðal gesta sem mættu á fund sjávarútvegs- og landbúnaðarnefndar Alþingis í morgun þar sem litla frumvarpið svokallað um breytingar á fiskveiðistjórnunarkerfinu var til umfjöllunar.

Í umsögn Alþýðusambandsins, sem þau Ólafur Darri Andrason, hagfræðingur ASÍ og Signý Jóhannesdóttir, varaforseti sambandsins, lögðu fram á fundi nefndarinnar, er lagt til að frumvarpið verði lagt til hliðar. Þá leggur Alþýðusambandið áherslu á mikilvægi þess að haft verði samráð við fulltrúa sambandsins um framhald málsins.

Í samtali við mbl.is gagnrýnir Signý þann asa sem verið hefur á málinu. Hún tekur sem dæmi að sendur hafi verið tölvupóstur til ASÍ sl. föstudag frá sjávarútvegs- og landbúnaðarnefnd þar sem óskað hafi verið eftir umsögn sambandsins sem leggja átti fram í dag.

„Maður skilur ekki þennan asa. Það er ekki eins og fiskurinn sé eitthvað að hverfa,“ segir Signý.