Urtan Esja með kópi. Fjölskyldu- og húsdýragarðurinn

Þrír nýir kópar svamla nú um í selalaug Fjölskyldu- og húsdýragarðsins en sá nýjasti kom í heiminn um helgina. Hafa nú allar þrjár urturnar í garðinum kæpt en það er nokkuð óvenjulegt því yfirleitt gengur illa að fá seli til að fjölga sér í dýragörðum.

„Við erum dálítið í sérflokki í þessum dýragarði vegna þess að yfirleitt gengur illa að láta seli fjölga sér í dýragörðum en það er alveg árvisst hér. Allar urturnar þrjár eru með kópum ár eftir ár. Við erum svolítið stolt af því,“ segir Hilmar Össurarson, dýrahirðir í Fjölskyldu- og húsdýragarðinum.

Hann segir kópana vinsæla hjá gestum garðsins. „Þetta er líflegt ungviði. Þeir fara að synda nokkra klukkustunda gamlir og eru yfirleitt mjög hraustir og afskaplega farsæl dýr.“

Ekki hefur verið venjan að nefna kópana þar sem þeir staldri stutt við í garðinum þó að gestir geri það gjarnan óformlega. Því verður sá draumur íslenskra aðdáenda kanadísku söngkonunnar Celine Dion að landsmenn geti farið í Húsdýragarðinn til að sjá selinn Díon að bíða enn um sinn.

„Einhverjum datt sá brandari í hug einhvern tímann og það var fleiri en eitt sumar sem það nafn kom upp. Það var aldrei gert opinberlega nema á milli starfsfólks,“ segir Hilmar og hlær.

Myndir af kópunum á vef Fjölskyldu- og húsdýragarðsins.

Celine Dion bíður enn eftir nafna í selalauginni í Laugardalnum. SHAUN BEST