Frá slysstað á Grindavíkurvegi. mbl.is/Hilmar Bragi

Hæstiréttur hefur dæmt karlmann á fertugsaldri í 9 mánaða óskilorðsbundið fangelsi fyrir manndráp af gáleysi en maðurinn ók ölvaður á Grindavíkurvegi árið 2009 og lenti í árekstri við annan bíl með þeim afleiðingum að ökumaður þess bíls, maður á fimmtugsaldri, lést.

Í dómnum kemur fram að maðurinn hafi ekið bifreið norður Grindavíkurveg en hún hafi farið yfir á rangan vegarhelming miðað við akstursstefnu með þeim afleiðingum að bifreiðin lenti þar í árekstri við bíl sem kom úr gagnstæðri átt.

Héraðsdómur Reykjaness hafði dæmt manninn í sex mánaða fangelsi, þar af fjóra mánuði skilorðsbundið, fyrir manndráp.

Við ákvörðun refsingar tók Hæstiréttur mið af því að með stórkostlega háskalegri háttsemi sinni hefði maðurinn valdið dauða annars manns, en maðurinn var bæði mjög ölvaður umrætt sinn og ók þar að auki án ökuréttinda.

Þá var litið til sakaferils hans en hann var sektaður og sviptur ökurétti í þrjú ár árið 2008 fyrir að aka ölvaður og án ökuréttar.

Fram kemur í dómnum, að maðurinn hafi sjálfur hlotið töluverða áverka við slysið en hafið aftur störf sem skipverji á fiskiskipi um ári síðar þótt einhver fjarvera frá starfi hafi orðið eftir það vegna afleiðinga slyssins. Þá hafi hann farið í áfengismeðferð í ágúst 2009 sem samkvæmt gögnum málsins hafi  með einu fráviki gengið vel.