Heimsóknir leikskólabarna í kirkjur verða enn leyfðar skv. tillögunum. Ásdís Ásgeirsdóttir

Helsta breytingin á endurskoðuðum tillögum mannréttindaráðs Reykjavíkurborgar um skólastarf og trúar- og lífsskoðunarmál sem afgreiddar voru til borgarráðs í vikunni frá þeim sem fyrst voru lagðar fram í vetur er sú að ekki er lengur tekið fyrir heimsóknir leikskólabarna í helgi- og samkomustaði trúar- og lífsskoðunarfélaga.

Í tillögunum sem lagðar voru til umsagnar hjá ráðum borgarinnar í vetur var gert ráð fyrir að slíkar heimsóknir hæfust fyrst á grunnskólastigi en í endurskoðuðum tillögum mannréttindaráðs segir nú að þar sem ekki sé sérstaklega getið um slíkar vettvangsheimsóknir leikskólabarna sem lið í fræðslu um trú og lífsskoðanir í aðalnámskrá leikskóla sé eðlilegt að miða fjölda slíkra heimsókna við það sem fram kemur í aðalnámskrá grunnskóla til að gæta samræmis milli skólastiga.

Þá er nú sérstaklega tekið fram að jólasálmar og helgileikir tengdir jólum haldi sess sínum í starfi frístundaheimila, leik- og grunnskóla líkt og sígildir söngvar, dansar, leikir og handíðir sem teljist hluti af gamalgrónum hátíðum og frídögum þjóðarinnar.