Steingrímur J. Sigfússon í ræðustóli á Alþingi. Myndin er úr safni. mbl.is/Kristinn

Lilja Rafney Magnúsdóttir, formaður sjávarútvegs- og landbúnaðarnefndar, mælti nú síðdegis fyrir breytingatillögu við breytingatillögu á frumvarpi um stjórn fiskveiða, svonefndu „litla kvótafrumvarpi“.

Meðflutningsmenn Lilju Rafneyjar eru Ólína Þorvarðardóttir, Björn Valur Gíslason, Róbert Marshall og Helgi Hjörvar. Annarri umræðu um  frumvarpið var haldið áfram á 153. fundi Alþingis sem hófst klukkan 16.30. Fundinum hafði þá verið frestað aftur og aftur.

Stjórnarandstæðingar gagnrýndu frumvarpið mjög. Pétur Blöndal taldi það vera til bóta að ýmislegt hafi verið fellt úr upphaflegu frumvarpi því frumvarpið sé slæmt og best að hafa sem minnst af af því.

„Ég boða hér með mjög harða andstöðu við frekari áform af þessum toga,“ sagði Bjarni Benediktsson, alþingismaður og formaður Sjálfstæðisflokksins með þunga. Hann sagði að 9 af hverjum 10 kílóum af kvóta sem nú eigi að hræra í séu úti á landi. Það eigi bara að hræra í þessu frá einum stað til annars. 

Frumvarpið gangi út á meiri miðstýringu og minni hagkvæmni. Hann sagði allt of langt gengið í frumvarpinu.

Steingrímur J. Sigfússon, fjármálaráðherra og formaður VG, lýsti ánægju sinni yfir því að vel horfði með afgreiðslu frumvarpsins. Hann kvaðst líta svo á að allir stjórnmálaflokkar og sjávarútvegurinn standi frammi fyrir þeirri áskorun að reyna að leiða þessi mál til farsællar niðurstöðu.

Hann minnti á að allir viðurkenni að gera verði breytingar á kvótakerfinu eins og það hefur verið. Steingrímur taldi það ágætan áfanga að ná því að afgreiða frumvarpið. 

Atkvæðagreiðslu var frestað eftir 2. umræðu lauk.