Verðlaunahafar og fulltrúar þeirra eru fyrir miðri mynd en fulltrúar í stjórn Verðlaunasjóðs Guðmundar P. Bjarnasonar frá Akranesi standa yst sitt hvorum megin. Ljósmynd/HÍ

Sex nemendur í eðlisfræði og efnafræði við Háskóla Íslands fengu í dag  verðlaun úr Verðlaunasjóði Guðmundar P. Bjarnasonar frá Akranesi fyrir framúrskarandi árangur í BS-námi í greinunum tveimur. Verðlaunin nema 750 þúsund krónum á hvern nemanda og eru því með þeim veglegustu sem veitt eru háskólanemum hér á landi.

Verðlaunum var úthlutað fyrir námsárangur  við brautskráningu árið 2009 og komu þau í hlut Þóreyjar Maríu Maríusdóttur  fyrir eðlisfræði. Þá voru veitt tvenn verðlaun fyrir námsárangur við brautskráningu árið 2010. Þau hlutu Inga Rún Helgadóttir fyrir eðlisfræði og  Katla Kristjánsdóttir fyrir efnafræði. Loks voru veitt þrenn verðlaun fyrir námsárangur við brautskráningu nú í vor. Þau hlutu Elvar Karl Bjarkason og Kristín Björg Arnardóttir fyrir eðlisfræði og Katrín Lilja Sigurðardóttir fyrir efnafræði.

Þetta er í fyrsta sinn frá árinu 2008 sem úthlutað er úr sjóðnum.  Ekki var svigrúm til að veita verðlaun árin 2009 og 2010 en sjóðurinn stendur nú fjárhagslega mjög vel og því var ákveðið að verðlauna sex nemendur í ár.

„Ljóst er að hlutfallslega færri nemendur sækja háskólanám í eðlis- og efnafræði á Íslandi en í samanburðarlöndum okkar.  Stuðningur Guðmundar við háskólanemendur í eðlis- og efnafræði er því sannarlega mikilvægt lóð á þá vogarskál að hvetja unga Íslendinga að sækja nám á þessum sviðum,“ segir í tilkynningu.