„Það verður hátíð, hvernig sem viðrar,“ segir Valdimar Jón Halldórsson, staðarhaldari á Hrafnseyri. Þar er allt að verða tilbúið fyrir Hrafnseyrarhátíð sem haldin er í dag en meira er í hana lagt en venjulega vegna þess að 200 ár eru liðin frá fæðingu Jóns Sigurðssonar forseta.

Meira að segja malarvegirnir í Arnarfirði og nágrenni hafa fengið andlitslyftingu. Sérstök nefnd hefur í fjögur ár undirbúið dagskrá afmælisársins. Settar hafa verið upp sýningar og efnt til málþinga til að minnast Jóns Sigurðssonar og starfs hans. Hápunkturinn er opnun nýrrar sýningar á Hrafnseyri við Arnarfjörð.

„Afmælisnefndin lagði áherslu á verkefni á Hrafnseyri og fer um helmingur þess fjármagns sem nefndin hefur úr að spila þangað,“ segir Björn G. Björnsson verkefnisstjóri. Afmælishaldið kostar alls um 149 milljónir kr. Hann segir að hugmyndin hafi verið að gera Hrafnseyri til góða þannig að staðurinn stæði jafnfætis öðrum mikilvægum stöðum í sögu og menningu þjóðarinnar.

Umgjörð sýningarinnar „Líf í þágu þjóðar“ er níutíu metra langur gegnsær veggur úr plexígleri sem grundvallast á hugmynd Basalt arkitekta sem valin var eftir samkeppni. Þar er komið fyrir myndum og upplýsingum um Jón Sigurðsson og einnig geta gestir fengið þar aðgang að ítarlegra margmiðlunarefni.

„Jón Sigurðsson er flókið viðfangsefni. Við höfðum það að leiðarljósi að sýna manninn sjálfan, ekki stunda hetjudýrkun,“ segir Björn í umfjöllun um sýninguna í Morgunblaðinu í dag. Auk persónunnar er reynt að gera starfsferli hans skil, bæði vísindastörfum hans og stjórnmálaþátttöku. Þá er fjallað um þá tíma og það umhverfi sem hann er sprottinn úr.