Rannsókn lögreglunnar á höfuðborgarsvæðinu á ásökunum á hendur tveimur kaþólskum prestum og kennara við Landakotsskóla um kynferðisbrot gagnvart ungum drengjum er á lokastigi. Er ákvörðunar um framhaldið að vænta fljótlega.

Björgvin Björgvinsson, yfirmaður kynferðisbrotadeildar lögreglunnar á höfuðborgarsvæðinu, segir í samtali við mbl.is að tvær kærur hafi borist lögreglu í lok síðasta árs. Annars vegar á hendur hollenska prestinum A. George og Margéti Müller, sem var þýsk og kennari við Landakotsskóla. Og hins vegar á hendur öðrum kaþólskum presti. Þau eru öll látin.

Fram kom í Fréttatímanum um helgina að fagráð um kynferðisbrot hafi til meðferðar mál tveggja manna sem saki presta og starfsmann kaþólsku kirkjunnar um andlegt og kynferðislegt ofbeldi.  

Brotin sem um ræðir voru framin á milli áranna 1962 og 1974. Mennirnir sem urðu fyrir ofbeldinu eru nú á sextugsaldri.

Björgvin segir að rannsókn lögreglu beinist að Landakotsskóla og kaþólsku kirkjunni því brotin gerist innan veggja stofnananna. „Það er ekkert útilokað að skoða það nánar,“ segir Björgvin en bætir við að engin ákvörðun hafi verið tekin hvað það varðar.

Ásakanirnar séu mjög alvarlegar og nú sé skoðað hvaða möguleikar séu í stöðunni.

„Málin eru á lokastigi og ákvörðunar um framhaldið er að vænta innan tíðar,“ segir Björgvin.