Starfshópur ráðuneyta um eldsneytisverð mun skila af sér lokaskýrslu eftir um það bil tvær vikur. Þetta segir Huginn Freyr Þorsteinsson, aðstoðarmaður Steingríms J. Sigfússonar fjármálaráðherra, en Huginn fer fyrir hópnum.

Steingrímur hefur þegar farið með minnisblað fyrir ríkisstjórn sem var unnið upp úr drögum að skýrslu starfshópsins. Gerði hann ríkisstjórninni grein fyrir hvernig vinnu hópsins hefur verið háttað og á hvaða lausnir hann bendir. Aðspurður vill Huginn ekki upplýsa hverjar niðurstöðurnar eru þar sem starfi nefndarinnar er ekki enn lokið. Ekki náðist í Steingrím í gær.

Ákváðu að gera lokaskýrslu

Runólfur Ólafsson, framkvæmdastjóri Félags íslenskra bifreiðaeigenda, gagnrýndi starfshópinn í Morgunblaðinu á þriðjudag og sagði að hann hefði átt að skila niðurstöðu fyrir einum og hálfum mánuði, en enn hefði ekkert heyrst. Huginn segir þetta í raun hvorki rétt né rangt hjá Runólfi. Hópurinn hafi átt að skila samantekt á vinnu sinni til fjármálaráðherra í maí og það hafi hann gert. Ekki hafi verið mælt fyrir um neina opinbera lokaskýrslu frá hópnum í skipunarbréfi hans, en samt hafi verið ákveðið að gera slíka skýrslu. Full þörf hafi verið á að taka málið til heildstæðrar skoðunar.

„Það verður þá viðameiri skýrsla sem tekur heildstætt á þróun eldsneytisverðs í heiminum, leggur mat á hvað er að gerast og hvað er líklegt að gerist og ber saman eldsneytisverð á milli landa. Líka hvernig álagningin er hjá hinu opinbera og hvað menn hafa gert í öðrum löndum til að mæta vandanum sem hækkandi bensín- og olíuverð orsakar,“ segir Huginn Freyr.

Fulltrúar sex ráðuneyta

Hann segir það mat flestra að eldsneytisverð haldi áfram að hækka. Í skýrslunni sé leitað svara við því hvernig megi bregðast við því til langs tíma við skipulagningu samgöngukerfisins og svo hinu, hvernig megi milda áhrifin af hækkuninni til skamms tíma. „Hátt bensínverð er komið til að vera,“ segir hann.

Hópinn skipa, auk Hugins, Stefán Einarsson frá umhverfisráðuneytinu, Þorsteinn Rúnar Hermannsson frá innanríkisráðuneyti, Margrét Sæmundardóttir frá efnahags- og viðskiptaráðuneyti, Erla Sigríður Geirsdóttir frá iðnaðarráðuneyti og svo Sigurður Snævarr hagfræðingur, sem er jafnframt efnahagsráðgjafi forsætisráðherra. Sigurður var fenginn inn í starf hópsins nokkru eftir að hann var skipaður, þar sem talin var þörf á því að fá meiri hagfræðiþekkingu inn í hópinn vegna þess hvaða mynd vinnan var að taka á sig. Í hópnum sitja því fulltrúar sex ráðuneyta, en þegar Steingrímur J. Sigfússon tilkynnti um nefndina í febrúar hafði hann aðeins fjögur ráðuneyti í huga.

Tryggvi Þór Herbertsson alþingismaður hefur lagt fram frumvarp um lægri álögur á eldsneyti, sem myndi leiða til 28 króna lækkunar á lítraverði bensíns og um 20 króna lækkunar á opinberum álögum á lítrann.

Fern gjöld á bensínið

Álögur á jarðefnaeldsneyti eru ýmislegar. Á hvern lítra er í fyrsta lagi lagt kolefnisgjald, sem er 3,80 krónur á bensín en 4,35 krónur á dísil.

Einnig er lagt 23,86 króna vörugjald á hvern bensínlítra og þar að auki er annað sérstakt vörugjald, sem kallast einfaldlega bensíngjald, en það nemur 38,55 krónum á lítrann af blýlausu bensíni. Bensín sem notað er á flugvélar er hins vegar undanþegið þessum vörugjöldum. Þá er lagður á 25% virðisaukaskattur ofan á þetta allt saman og nemur hlutur ríkisins þá um helmingi bensínverðsins. Jóhanna Sigurðardóttir forsætisráðherra hefur sagt að ef þessi gjöld verði lækkuð þurfi að finna aðrar tekjur á móti annars staðar.