mbl.is/Arnaldur

Umboðsmaður skuldara bendir á að 30. júní nk. sé mikilvæg dagsetning fyrir skuldara. Fram kemur í tilkynningu að tímabundið ákvæði í lögum um greiðsluaðlögun einstaklinga, þess efnis að frestun greiðslna (greiðsluskjól) hefjist við móttöku umsóknar falli niður þann 1. júlí næstkomandi.

Þá segir að greiðsluaðlögun einstaklinga haldi áfram sem varanlegt úrræði fyrir skuldara í greiðsluvanda. Breytingin séu sú að þeir sem sæki um 1. júlí eða síðar fái ekki frestun greiðslna fyrr en umsókn þeirra hafi verið samþykkt hjá umboðsmanni skuldara, en ekki við móttöku umsóknar líkt og nú sé.

„Athugið að þessi breyting hefur engin áhrif á þær umsóknir um greiðsluaðlögun sem berast fyrir 1. júlí. Þeir sem komnir eru í greiðsluskjól fyrir 1. júlí, halda því áfram þar til umsókn þeirra hefur verið afgreidd og/eða samningur um greiðsluaðlögun kemst á,“ segir í tilkynningunni.

Fram kemur að þeir sem sækja um greiðsluaðlögun eftir 1. júlí, fái hins vegar ekki frestun greiðslna fyrr en umsókn um greiðsluaðlögun hafi verið samþykkt af umboðsmanni skuldara.

„Það getur því skipt miklu fyrir umsækjendur hvort þeir sækja um fyrir eða eftir næstu mánaðarmót. Þeir sem telja sig þurfa frestun greiðslna strax og telja sig uppfylla skilyrði greiðsluaðlögunar eru því hvattir til að sækja um greiðsluaðlögun fyrir 1. júlí,“ segir í tilkynningunni.

Nánar á vef Umboðsmanns skuldara.