mbl.is/RAX

Héraðsdómur Reykjavíkur hefur dæmt tryggingafélag til að greiða múrarmeistara, sem lenti í alvarlegu slysi árið 2007, 4,7 milljónir í bætur.

Maðurinn, sem er sjálfstætt starfandi múrarameistari, féll af vinnupalli í janúar 2007 með þeim afleiðingum að hann hlaut 50% varanlega örorku. En fram kemur í dómnum að vinnupallurinn hafi verið vanbúinn þegar slysið varð.

Í greinargerð mannsins, sem hefur starfað við múrverkí tæpa fjóra áratugi, kemur fram að vinnupallurinn hann notaði til að flytja 200 lítra vatnstunnu eftir hafi verið ófullnægjandi hvað varðar fallvarnir næst svölum sem maðurinn virðist hafa verið á leiðinni upp á, auk þess sem 80 cm bil milli vinnupallsins og svalanna hafi verið brúað með dokaplötu sem hafi verið mjórri en vinnupallurinn og svalirnar.

Fram kemur í dómi héraðsdóms að 26. september 2009 hafi tryggingafélagið greitt manninum 6,5 milljónir kr. í bætur vegna slyssins. Við uppgjör var á því byggt að stefnandi bæri 1/3 sakar.

Maðurinn tók við bótunum með fyrirvara um alla kröfuliði uppgjörsins.

Í málinu sem héraðsdómur hefur nú dæmt í, krafðist maðurinn félagið um frekari bætur vegna slyssins. Ágreiningur laut að eigin sök mannsins í slysinu og deilt var um viðmiðunartekjur.

Deilt var um frekari fjárkröfur mannsins vegna tímabundinnar örorku og vegna varanlegrar örorku. Ekki var um tölulegan ágreining að ræða en deilt var um þær forsendur sem byggt var á af hálfu stefnanda. Ágreiningur var ekki um kröfu stefnanda um bætur vegna varanlegs miska og þjáningabætur.

Dómari segir að þótt fallast megi á að maðurinn hafi ekki sýnt fulla aðgæslu með því að kanna ekki ástand pallsins nánar áður en hann lagði af stað með tunnuna þykir, eins og atvikum háttar, aðgæsluleysi hans svo lítilvægt í samanburði við það hvað pallurinn var vanbúinn og hættulegur að ekki þykja efni til þess að leggja sök á stefnanda vegna slyssins. Telst stefndi því bera fulla sök á slysinu 12. janúar 2007 með því að hafa ekki tryggt að aðstæður á vinnustað væru fullnægjandi.