Sjúkraliðar hjá borginni reiðir
Sjúkraliðar hafa enn ekki náð samningi við Reykjavíkurborg, aðeins ríkið.
Þó að sjúkraliðar séu búnir að semja við ríkið er enn ósamið við Reykjavíkurborg. Samningar hafa verið lausir síðan árið 2009 og síðasti samningur var gerður 2008. Mikil reiði er ríkjandi meðal sjúkraliða hjá borginni, sem funda á morgun um sín mál.
„Fjallað verður um alvarlega stöðu í kjaramálum sjúkraliða hjá Reykjavíkurborg. Ekkert hefur þokast í samkomulagsátt þrátt fyrir margra mánaða samningaþóf. Sjúkraliðar hjá Reykjavíkurborg eru hvattir til að mæta, á fundinum verður tekin ákvörðun um viðbrögð við þessari alvarlegu stöðu," segir í fundarboði en sjúkraliðar munu koma saman í húsakynnum BSRB.
Um er að ræða sjúkraliða er starfa á hjúkrunarheimilum sem Reykjavíkurborg rekur og einnig þá sem vinna við heimahjúkrun. Kristín Á. Guðmundsdóttir, formaður Sjúkraliðafélags Íslands, segir hvorki hafa gengið né rekið í viðræðum við borgina og nú síðast hafi ríkissáttasemjari metið stöðuna svo að ekki væri ástæða til að halda næsta samningafund fyrr en í byrjun ágúst nk. Á sama tíma eru sjúkraliðar í viðræðum við önnur sveitarfélög og næsti slíki samningafundur hefur verið boðaður á fimmtudag.
Kristín segist vilja heyra hljóðið í sínum félagsmönnum hjá borginni á morgun, áður en hægt sé að kveða upp úr um hvort gripið verði til einhverra verkfallsaðgerða eða vinnustöðvunar. Þolinmæði sjúkraliða sé amk. á þrotum og framkoma samninganefndar borgarinnar sé ólíðandi.
Að sögn Kristínar hafa sjúkraliðar hjá ríkinu náð nokkrum samningum frá því að starfsfélagar þeirra hjá borginni fengu síðast samning fyrir þremur árum, t.d. eingreiðslur í þrígang og samningsbundnar hækkanir. Hefur myndast launabil á milli þessara stétta, innan sama fagfélagsins, og á byrjunarlaunum sjúkraliða hafi munað 10% - starfsmönnum hjúkrunarheimila og heimahjúkrunar í óhag. Kristín telur þennan mun enn hafa aukist eftir nýgerðan samning við ríkið.
„Það virkar mjög undarlega á okkur að ekki sé hægt að ganga frá samningi við Reykjavíkurborg," segir Kristín. Hjúkrunarheimili sem um ræðir eru m.a. Seljahlíð, Droplaugarstaðir og Dalbraut, auk heimahjúkrunar.
Að sögn Kristínar hefur gengið erfiðlega að manna stöður sjúkraliða á þessum hjúkrunarheimilum, einkum á Droplaugarstöðum. Ljóst sé að launamunurinn sé farinn að fæla sjúkraliða frá og þeir leiti frekar í önnur störf.
