mbl.is/Helgi Bjarnason

Á fjölmennum fundi félagsmanna FFR og SFR á Keflavíkurflugvelli í gærkvöldi lýstu fundarmenn yfir fullum stuðningi við samninganefndir sínar.

Félögin hafa síðustu vikur setið við samningaborðið með fulltrúum frá ISAVIA. Kjaradeilunni var fyrir nokkru vísa til sáttasemjara sem stýrt hefur vinnunni, segir í tilkynningu.

„SFR og FFR hafa haft af því áhyggjur hversu hugmyndir ISAVIA um kjaraþróun þeirra sem við lægstu launin búa, hafa reynst rýrar. Síðastliðinn föstudag settu samningamenn ISAVIA fram tilboð sem var algerlega óaðgengilegt og var fundi slitið.

Í dag, þriðjudag kl. 13:00, hefur sáttasemjari boðað aðila til samningafundar og verður þar lögð fram ályktun frá félagsfundinum sem haldinn var í gær á Keflavíkurflugvelli," segir í tilkynningu.

„Félagsfundur félagsmanna í FFR og SFR haldinn á Keflavíkurflugvelli 27. júní 2011, ályktar eftirfarandi vegna kjarasamningsviðræðna félaganna við SA/Isavia ohf:
Í samningaviðræðum milli Félags flugmálastarfsmanna ríkisins og SFR – stéttarfélags í almannaþjónustu annars vegar, og SA/Isavia hinsvegar, hafa félögin sett fram ýmsar hugmyndir og kröfur sem lúta að bættum vinnuskilyrðum félagsmanna. Mikil áhersla er meðal annars  lögð á leiðréttingu launakjara þeirra, sem lökustu launin hafa  en bera mikla ábyrgð í starfi.

Samninganefndir FFR og SFR hafa ítrekað bent á það ójafnvægi sem er í kjaraumhverfi Isavia og krefjast þess að Isavia láti af láglaunastefnu sinni og viðurkenni ábyrgð og auknar kröfur sem gerðar eru til starfsmanna.

Félagsfundur FFR og SFR lýsir yfir fullum stuðning við samninganefndir félaganna og hvetur þær til að hvika hvergi frá þeim sanngjörnu kröfum sem settar hafa verið fram í viðræðunum.  Fundurinn hvetur einnig samninganefnd SA/Isavia til að koma á móts við þessar réttmætu kröfur félaganna og vinna að gerð kjarasamninga án frekari erfiðleika," segir í ályktun fundar FFR og SFR.