Höfuðborgarbúar ættu að hafa regnhlífar uppivið um helgina

Talsverðar breytingar eru í veðurkortunum og útlit fyrir að veður fari að batna fyrir norðan eftir kuldatíð undanfarið. Þetta er meðal þess sem kemur fram á veðurvef Einars Sveinbjörnssonar.

Lægð er spáð úr suðvestri og með henni mildara og líka rakar loft.  Mikið mun hlýna norðan- og norðaustanlands við þessi umskipti.  

Föstudagur 1. júlí:

Fyrri hluta dagsins hvessir með suðurströndinni frá skilum lægðarinnar sem nálgast óðfluga.  Allt að 15-18 m/s syðst og almennt séð allhvass vindur sunnanlands og með rigningu eftir því sem líður á daginn.  Norðan til verður veður hins vegar mun skaplegra. Úrkomulaust og sólskin, einkum framan af deginum.  Smámsaman hlýandi og allt að 13 til 16 stiga hiti, hlýjast norðanlands og eins á Vestfjörðum og Vesturlandi.

Laugardagur 2. júlí:

Skil lægðarinnar verða að leið yfir landið framan af deginum ef af líkum lætur og með skúrum eða rigning í flestum landshlutum.  Síst þó norðanlands.  Vindbelgingur af SA og A verður víða eða þetta 5 til 10 m/s og sums staðar enn meiri vindur.  Hins vegar verður með þessu milt í veðri allt að 15 til 18 stiga hiti norðanlands. Á Suður- og sérstaklega suðausturlandi verður meira og minna samfelld rigning og eins norður með Austfjörðum. 

Sunnudagur 3. júlí:

Enn SA-átt, en á sunnudag verður vindur orðinn víðast hægur.  Rigning eða skúrir sunnan- og suðaustanlands, en norðan- og norðvestanlands léttir víða til.  Suðvestan- og vestanlands verður að mestu þurrt, en þó er ekki hægt að útiloka rigningarskúri, sérstaklega síðdegis.  Hiti allt að 18 stig á Norðurlandi í kring um Eyjafjörð og þar í grennd.  Það má alveg gera ráð fyrir að þó nokkrir vatnavextir verði, sérstaklega suðaustanlands í rigningunni þar og eins mun verða talsverð leysing þegar loks hlýnar á hálendinu og vatn á ferðinni niður til byggða, skrifar Einar hér.