mbl.is/Halldór Sveinbjörnsson

Enn hefur ekki verið leyst úr flækjunni sem skapaðist við sölu eigna úr þrotabúi Eyrarodda á Flateyri.

„Eins og staðan er í dag kemur Byggðastofnun ekki lengur að samningunum. Samningsaðilarnir eru Landsbankinn, Lotna ehf. og Toppfiskur og milli þeirra eru viðræður í fullum gangi,“ segir Hjalti Árnason, lögfræðingur hjá Byggðastofnun í samtali við Bæjarins besta.

„Það eru þreifingar í gangi en ekki komin niðurstaða. Við göngum út frá því að finna niðurstöðu sem allir geta verið sáttir við og þannig að báðir aðilar geti stundað útgerð eða fiskvinnslu á Flateyri til framtíðar,“ segir Sigurður Aðalsteinsson, einn eigenda Lotnu.

Vegna þeirra tafa sem orðið hafa á sölu þrotabúsins hefur krókaaflamarksbáturinn Stjáni Ebba ÍS ekki róið frá því í desember á síðasta ári. Bátnum hefur þó verið úthlutað byggðakvóta fyrir þetta fiskveiðiár en nú styttist í að kvótaárinu ljúki. Nái Stjáni Ebba ekki að veiða umræddan byggðakvóta er ljóst að hann brennur inni og útgerðin fær ekki úthlutun á næsta ári. Verði þetta raunin gæti þrotabúið orðið af tugum milljóna króna.

Sjá nánar hér