Sveinn Andri Sveinsson, lögmaður Wikileks og Datacell, segir bótakröfur hljóða upp á milljónir evra.

Wikileaks og Datacell hyggjast í næstu viku kæra kortafyrirtækin Visa og Mastercard vegna ólöglegra afskipta af greiðslum með því að hafa stöðvað allar greiðslukortafærslur til Wikileaks. Þá stefna Wikileaks og Datacell sömuleiðis að því að kvarta til Evrópusambandsins vegna meintrar misnotkunar stóru kortafyrirtækjanna á markaðsráðandi stöðu.

Datacell er íslenskt fyrirtæki sem sér um að hýsa vefsíðu Wikileaks.  Í desember á síðasta ári lokuðu Visa og Mastercard á greiðslur til Wikileaks í gegnum Datacell að beiðni bandarískra stjórnvalda. Talið er að Wikileaks hafi orðið fyrir milljóna tjóni í evrum talið vegna þessa. Nær öll starfsemi Wikileaks er byggð á frjálsum framlögum og mjög erfitt var að taka við slíkum framlögum eftir að lokað hafði verið á greiðsluþjónustu. 

Sveinn Andri Sveinsson er einn lögmanna Datacell og Wikileaks. Í samtali við mbl.is segir hann málshöfðunina meðal annars beinast gegn danska fyrirtækinu Teller sem hafi séð um greiðslugáttina hjá Datacell.

„Málið verður höfðað í Danmörku vegna samningsrofa Teller við Datacell. Teller byggir á því að samningsrofin hafi verið í lagi þar sem ákvæði í samningnum við Datacell segir að það megi loka á greiðslumiðlun komi fyrirskipun frá stóru kortafyrirtækjunum,“ segir Sveinn Andri. Lögmenn Datacell muni hins vegar byggja á því að að ákvæðið sé ógildanlegt út frá 36. gr. dönsku samningalaganna þar sem talað er um bersýnilega ósanngjarnan samning.

Bótakröfur fyrir tugi milljóna evra

Sveinn Andri segir bótakröfur í málinu nema tugum milljóna evra. Hann segir það gríðarlega kostnaðarsamt fyrir Datacell að halda úti vefsíðu Wikileaks. Tölvuþjónar verði fyrir stöðugum árásum frá hökkurum sem starfi meðal annars fyrir bandarísk stjórnvöld. 

Auk málshöfðunar munu Wikileaks og Datacell kvarta undan kortafyrirtækjunum til Evrópusambandsins. Sveinn Andri segir Evrópusambandið hafa heimild til að sekta fyrirtæki vegna misnotkunar á markaðsráðandi stöðu. Slíkar sektir geti numið allt að 10% af veltu fyrirtækjanna. Því sé um gríðarlegar fjárhæðir að ræða. 

Julian Assange, stofnandi Wikileaks. Wikileaks ætlar nú í hart gegn stóru kortafyrirtækjunum. Reuters