Ráðhús Reykjavíkur. mbl.is/Hjörtur

Héraðsdómur Reykjavíkur hefur dæmt Reykjavíkurborg til að endurgreiða bílaumboðinu Brimborg 136 milljónir króna gatnagerðargjöld ásamt vöxtum vegna lóðar, sem fyrirtækið fékk úthlutað við Lækjarmel í Reykjavík. 

Er endurgreiðslan háð því, að Brimborg skili lóðinni til Reykjavíkur ásamt þeim byggingarrétti sem lóðinni fylgir. Dómurinn vísaði hins vegar frá kröfu Brimborgar um að fella úr gildi ákvörðun borgarinnar frá árinu 2009 um að neita fyrirtækinu um að skila lóðinni aftur.  

Í niðurstöðu dómsins segir, að þegar Brimborg lýsti því yfir 9. október 2008 að hann skilaði lóðinni hafi hann haft  réttmætar væntingar til þess, að með þeirri yfirlýsingu myndi úthlutunin ganga til baka og að gatnagerðargjöldin yrðu endurgreidd. Það hafi raunar verið stefna Reykjavíkurborgar en grundvallarbreyting hafi orðið á þeirri stefnu við efnahagsáföllin haustið 2008.

Héraðsdómur segir, að málefnalegar ástæður hafi verið fyrir þessari breytingu og hún stangaðist ekki á við ákvæði skilmála borgarinnar eða lagafyrirmæli. Ákvörðun um að breyta almennri stjórnsýsluframkvæmd, sem hafi  tíðkast lengi og verið almennt kunn, verði þó jafnan að taka á formlegan hátt og kynna hana þannig að þeir sem breytingarnar varða geti gætt hagsmuna sinna. 

Segist dómurinn telja,  að Reykjavíkurborg hafi borið á grundvelli almennra reglna stjórnsýsluréttar að taka tillit til þeirra réttmætu væntinga Brimborgar um að fyrirtækið gæti skilað lóðinni og fengið gjöld endurgreidd. Eins og málið liggi fyrir dóminum verði að draga þá ályktun að þessa atriðis hafi ekki verið gætt af hálfu borgarinnar.

Í því ljósi verði að telja að Brimborg hafi átt rétt á því að leyst yrði úr erindi fyrirtækisins í samræmi við eldri stjórnsýsluframkvæmd. Fellst dómurinn því á fjárkröfu Brimborgar.