Egill Jóhannsson, forstjóri Brimborgar, er ánægður með niðurstöðu héraðsdóms í dag. Kristinn Ingvarsson

„Þetta er mjög ánægjulegt, sérstaklega í ljósi þess hversu reksturinn er gríðarlega erfiður í þessu umhverfi,“ segir Egill Jóhannsson, forstjóri Brimborgar, um dóminn sem féll í héraðsdómi Reykjavíkur í dag.

Niðurstaða dómsins var sú að Reykjavíkurborg bæri að endurgreiða bílaumboðinu gatnagerðargjöld sem umboðið greiddi þegar það fékk úthlutað lóð við Lækjarmel í febrúar árið 2006. Hleypur upphæðin á 136 milljónum króna ásamt dráttarvöxtum.

„Þetta fer alveg eins og við erum búin að halda fram frá upphafi, bæði í samræmi við það sem ráðuneytið komst að á sínum tíma, að þetta væri ekki samkvæmt góðri stjórnsýslu hvernig þeir unnu þetta, og að þótt að menn kæmust að þeirri niðurstöðu að borgin gæti breytt reglum, gæti hætt að taka við lóðum, þá þyrfti að kynna það með formlegum hætti,“ segir Egill.

Hann segir niðurstöðuna vera áfellisdóm yfir vinnubrögðunum sem voru viðhöfð hjá borginni.

„Við skilum 9. október (2008) og það stendur í lögum að borgin hafi 30 daga til að endurgreiða. Við sendum síðan ítrekun 15. nóvember og dómarinn tekur einmitt fram að við sýndum ekkert tómlæti í málinu heldur gerðum allt það sem okkur bar að gera.

Það er ekki fyrr en 20. nóvember, 41 degi eftir að við höfðum skilað lóðinni, sem borgin heldur þennan borgarráðsfund sem samþykkir breyttar reglur. Fram að þeim tíma höfðum við ekki heyrt múkk frá þeim,“ segir Egill. Því hafi Brimborg haft réttmætar væntingar um að getað skila lóðinni.

„Það sem gerir okkar mál síðan enn sterkara miðað við önnur er að við vorum með tölvupóst, sem dómarinn vitnar sérstaklega í í lokaorðum dómsins, frá Ágústi Jónssyni sem sér um framkvæmd þessara mála. Þar kemur bara beinlínis fram að ef Brimborg hefur fallið frá byggingaráformum þá beri fyrirtækinu tafarlaust að skila lóðinni gegn endurgreiðslu gatnagerðargjalda.“