Af vef Nóa Síríus.

Sælgætisframleiðandinn Nói Síríus segir að engin óæskileg litarefni sé að finna í vörum fyrirtækisins. Þá segir það að eldri umbúðir verði innkallaðar.

Þetta kemur fram í tilkynningu sem Nói Síríus hefur sent frá sér vegna fréttar RÚV frá því í gærkvöldi, þar sem fjallað var um notkun ákveðinna  litarefna í sælgæti og fleiri vörum. Fram hafi komið að litarefnin væri að finna í vörum frá Nóa Síríus. Fyrirtækið segir að það sé ekki allskostar rétt.

„Hið rétta er að Nói Síríus hætti að nota þessi litarefni í allri sinni framleiðslu fyrir ári síðan. Hins vegar tekur það ávallt nokkurn tíma tekur að koma nýjum umbúðum í umferð þar sem upplýsingar um litarefnin hafa verið fjarlægð. Eitthvað kann því að vera eftir af vörum þar sem upplýsingar um litarefnin koma fram, jafnvel þó að varan innihaldi þau ekki lengur,“ segir í tilkynningu.

„Rétt er að taka fram að áðurnefnd litarefni hafa ekki verið bönnuð, hvorki með lögum né reglugerðum. Það hefur þó ávallt verið markmið Nóa Síríus að vera í fararbroddi í gæðum við framleiðslu sælgætis og því var notkun litarefnanna hætt. Sömuleiðis er það stefna Nóa Síríus að neytendur geti ávallt treyst þeim upplýsingum sem fram koma á umbúðum. Nói Síríus harmar þau mistök að rangt merktar umbúðir hafi í sumum tilfellum mátt finna í verslunum og mun strax innkalla þær,“ segir ennfremur.

Þá segir að starfsfólk Nóa Síríus fylgist vel með umræðum um aukaefni í matvælum og leggi áherslu á að vera á undan löggjafanum að bregðast við nýjum kröfum markaðarins.