Hótel Höfðabrekka. mbl.is/GSH

Þeir sem reka ferðaþjónustu í Vestur-Skaftafellssýslu eru að vonum uggandi vegna þeirrar stöðu, sem nú er komin upp þegar hringvegurinn er í sundur við Múlakvísl austan við Vík.

„Það er afar brýnt að samgöngurnar komist í lag," sagði Björgvin Jóhannesson, hótelstjóri á Hóteli Höfðabrekku í Mýrdalshreppi.

Hann segir, að þegar hafi hópar afpantað gistingu á hótelinu, en um er að ræða ferðafólk, sem ætlaði að koma að austan en verður nú annaðhvort að fara norður fyrir land eða um Fjallabak og fer því framhjá Vík.

Hótelið var stækkað í vor og þar eru nú 72 herbergi. Jóhannes Kristjánsson á Höfðabrekku sagði, að fullbókað hafi verið í nótt og þar gistu 130 manns enda er nú háannatíminn í ferðaþjónustunni.  Hann segir eins og Björgvin sonur hans, að gríðarlegu máli skipti að hringveginum verði komið í samt lag strax enda hafi þetta ástand áhrif á ferðaþjónustuna um allt land.

Jóhannes sagði, að náttúruhamfarirnar á Suðurlandi frá því í apríl í fyrra hefðu verið erfiðar og svona ástand sé það versta, sem komið geti fyrir í ferðaþjónustu. Ferðafólk vilji öryggi og því hafi náttúruhamfarir og verkföll afar slæm áhrif.

Jóhannes Kristjánsson á Höfðabrekku. mbl.is/GSH