Ögmundur Jónasson, innanríkisráðherra, virðir skemmdirnar fyrir sér við Múlakvísl. mbl.is/Jónas Erlendsson

Samtök ferðaþjónustunnar segja neyðarástand skapast í ferðaþjónustunni ef ekki takist að koma vegsambandi yfir Múlakvísl fyrr en eftir 2-3 vikur.

Í tilkynningu frá samtökunum er lýst furðu yfir viðtali við vegamálastjóra í gær þar sem hann sagði að það myndi væntanlega taka 2 til 3 vikur að koma á umferð yfir Múlakvísl eftir að brúna tók af í jökulhlaupi.  „Stjórnendur fyrirtækja í greininni trúa ekki að stjórnvöldum sé alvara,“ segir í tilkynningunni.

„Það er algjörlega ótækt að hægt sé að hafa þjóðveg 1 lokaðan í svo langan tíma yfir háönnina í ferðaþjónustu.  Það er mikilvægt að halda Fjallabaksleið nyrðri vel færri, eins og stefnt er að, en það eru þúsundir bifreiða á ferðinni á þessu svæði og stærsti hluti þeirra eiga ekkert erindi inn á Fjallabak og má nefna mikinn fjölda smábíla og venjulegar rútur sem munu stórskemmast,  auk þess sem Fjallabaksleið mun aldrei geta annað þessari miklu umferð.  

Það má búast við því að afbókanir hópa fari að berast strax eftir helgi ef ekki liggur fyrir önnur áætlun en sú að hringvegurinn verði lokaður í 2-3 vikur. Það er gríðarlegur kostnaður við að endurskipuleggja ferðir og greiða skaðabætur vegna ferða sem ekki er hægt að fara.

Það er skýlaus krafa ferðaþjónustunnar að öllum tiltækum ráðum verði beitt til að opna leið yfir Múlakvísl sem allra fyrst.  Hver dagur er mjög dýr þar sem ferðir um hringveginn er ein helsta söluvara ferðaþjónustunnar.  

Hér með er því beint til innanríkisráðherra, sem jafnframt er ráðherra samgöngumála, að hann beiti sér af öllu afli í þessu mikilvæga máli og að unnið verði allan sólarhringinn við að opna þessa leið.  Vegna verkefnaskorts í vegagerð mun mikið til af mannskap, tækjum og tólum svo möguleikarnir til að bregðast hratt við eru fyrir hendi.“