Múlakvísl. mbl.is/Jónas Erlendsson

Bráðabrigðabrúin, sem reisa á yfir Múlakvísl, verður 150-160 metra löng en ekki er talið ráðlegt að minnka vatnsopið frá því sem það er núna. Brúin verður vestan við gömlu brúna.

Vegagerðin segir, að báðir brúarvinnuflokkar Vegagerðarinnar komi á staðinn í dag með lið sitt og búnað. Bætt verði við mannskap eftir þörfum. Nú þegar sé unnið í jarðvinnu á svæðinu, m.a. fyllingu svo hægt sé að vinna á svæðinu og við að losa á grjót í rofvarnir.

Allt efni, sem þarf til að byggja brúna, er til,  þ.e. stálbitar og timbur og er verið að flytja það á staðinn. Hluti tækja er kominn austur og það sem vantar af tækjum er á leiðinni. 

Þá er verið að bæta í vegina bæði á Fjallabaksleið nyrðri og Dómadalsleið og eru tæki á staðnum. Vegagerðin segir, að hraður akstur gæti þó farið illa með vegina og vöð en settar verði upp merkingar um 60 km hámarkshraða og 5 km leiðbeinandi hraða við vöð. Öxulþungi verður takmarkaður við 7 tonn á báðum vegum. Veginum verður haldið við. Björgunarsveitir eru á Fjallabaksleið.

Stjórnvöld hafa heimilað Vegagerðinni að flytja fólk yfir vað á Múlakvísl á vörubifreið eða sérútbúinni rútu og einnig að flytja bíla yfir með vörubifreiðum. Bílar eru komnir á staðinn og hefjast flutningar innan skamms eða um leið og vað verður tilbúið. Björgunarsveitir munu skipuleggja ferðirnar yfir kvíslina en Vegagerðin sér um vaðið og heldur því við.

Vegagerðin ber kostnaðinn af þessum flutningi sem verður almenningi að kostnaðarlausu.