Háskólinn í Reykjavík er meðal eigna Fasteignar ehf. mbl.is/Ernir

Tillaga hefur verið lögð fyrir sveitarfélögin sem standa að Fasteign ehf. sem felur í sér að losa Háskólann í Reykjavík, Álftanes og eignir fjármálafyrirtækja út úr félaginu og endursemja við bankana um fyrirkomulag lána Fasteignar.

Árni Sigfússon, bæjarstjóri Reykjanesbæjar og stjórnarformaður Fasteignar, segir i grein á vef Víkurfrétta að þessar breytingar sem nýlega hafi verið kynntar fyrir sveitarfélögunum sem eru aðilar að Fasteign, hafi verið metnar jákvæðar af þeim.

„Leigusamningar munu taka mið af lánsupphæð en áður voru þeim einnig viðhalds- og rekstrarkostnaður, auk arðsemiskröfu. Sveitarfélögin munu nú sjálf sjá um rekstur og viðhald eignanna og arðsemiskrafan er nánast felld niður. Sveitarfélögin eignast svo eignirnar í lok leigutíma. Í reikningsskilareglum sem sveitarfélögum er skylt að fara eftir var farið að meta leiguskuldbindinguna út leigutíma til skuldar og því hækkuðu skuldir sveitarfélaganna mjög mikið samkvæmt þessari reglu.

Við þessa breytingu nú lækka skuldbindingar (skuldir) sveitarfélaganna umtalsvert en á móti lækkar hlutafé þeirra í EFF [Fasteign]. Í tilviki Reykjanesbæjar var það hlutafé, 526 milljónir kr., upphaflega tekið af því fé sem EFF greiddi fyrir eignirnar á sínum tíma.

Hlutfall skulda og eigna vegna þessara breytinga er hagstætt fyrir öll sveitarfélögin, einnig Reykjanesbæ. Þess vegna mun Reykjanesbær samþykkja að vinna eftir þessum leiðum áfram.“

Hannes Friðriksson, íbúi í Reykjanesbæ, furðar sig á þessum útskýringum bæjarstjórans og spyr hvort hlutfall skulda Reykjanesbæjar lækki við að taka á sig skuldir Álftaness.

Hannes vitnar í samningsramma sem hafi verið kynntur og verði væntanlega samþykktur í bæjarráði Reykjanesbæjar á fimmtudaginn en þar segi:

„Fasteign mun einnig ganga frá uppgjöri við Álftanes og greiðir til Íslandsbanka það sem fæst greitt upp í eftirstöðvar veðskuldabréfsins (u.þ.b. 68%). Íslandsbanki mun aflétta veðböndum af þeim eignum sem Álftanes yfirtekur og lækka lánin í samræmi við verklagsreglur bankans um lán sem breytt er yfir í ISK. Þá munu Íslandsbanki og Fasteign gera með sér nýjan lánasamning um eftirstöðvar lánsins sem ekki hafa fengist greiddar.“

Víkurfréttir