Kreditkort Reuters

WikiLeaks og DataCell, sem sér um að hýsa vefsíðu WikiLeaks , hafa sent inn kvörtun til framkvæmdastjórnar Evrópusambandsins vegna Visa og Mastercard.

Visa og Mastercard lokuðu á greiðslur til Wikileaks í gegnum Datacell að beiðni bandarískra stjórnvalda í desember í fyrra. Svo til öll starfsemi Wikileaks er byggð á frjálsum framlögum og mjög erfitt var að taka við slíkum framlögum eftir að lokað hafði verið á greiðsluþjónustu.

Sveinn Andri Sveinsson, einn lögmanna DataCell og WikiLeaks sagði í samtali við AFP fréttastofuna í dag að kvörtunarbréf hafi verið sent til framkvæmdastjórnarinnar og það yrði formlega skráð á morgun.

Hann segir að  Visa Europe og MasterCard Europe séu í kvörtuninni sökuð um að brjóta gegn samkeppnisreglum Evrópusambandsins meðal annars misnotkun vegna ráðandi stöðu á markaði og mismunun viðskiptavina.

Sveinn Andri sagði í samtali við mbl.is í síðustu viku að kvörtun yrði send til Fjármálaeftirlitsins og farið yrði fram á að  Valitor verði svipt leyfi til að starfa sem greiðslumiðlun.

„Þetta  fyrirtæki er í algjörri einokunaraðstöðu og þeir geta bara ekkert gert það sem þeim sýnist. Þessi tvö kortafyrirtæki eru með 96% markaðsins í Evrópu og verða alltaf að vera á tánum um að framfylgja hlutleysi. Þarna eru þeir að nýta sér yfirburðastöðu sína til að hindra að fólk geti styrkt starfsemi WikiLeaks,“ segir Sveinn Andri í samtali við mbl.is.

 Frétt mbl.is