Haugefisk kemur til hafnar á Húsavík mbl.is/Hafþór

Eftir Hafþór Hreiðarsson á Húsavík

Skip og bátar sem boðað hafa komu sína á Sail Húsavík eru farnir að koma til hafnar og nú síðdegis kom norski línubáturinn Haugefisk að landi eftir siglingu frá Noregi.

Vilborg Arna Gissurardóttir verkefnisstjóri Sail Húsavík var á kajanum og sagði hún að von væri á Húna II í kvöld, MS. Sjökurs, sem áður var farþegaskip við Noregsstrendur en er nú skólaskip, kemur snemma í fyrramálið og síðan koma þau koll af kolli.

Á heimasíðu Sail Húsavík segir að Haugefisk hafi verið smíðaður árið 1978 á skipasmíðastöðinni H & E Nordtvedt á Fusa í Hörðalandi. Skipið var notað til línuveiða á tímabilinu 1978-2005 og er eitt af fyrstu skipunum sem var smíðað fyrir þessa nýju tækni. Árið 2005 var skipið undanþegið úreldingu. Í skipinu er 660 hestafla sexstrokka Alpha díselvél. Engar breytingar hafa verið gerðar á skipinu. Nýrri tækjabúnaður hefur verið fjarlægður og það á að gera það upp svo það verði eins og það var um 1990.

Eigandi í dag er Strandsafnið í Sogni og Fjörðunum (Kystmuseet i Sogn og Fjordane) sem mun nota skipið sem safn, til menningarmiðlunar og kennslu. Haugefisk á að vera fljótandi menningararfur og er fulltrúi fyrir nútíma fiskveiðisögu Noregs.