Auglýsingar um Tax Free daga verði skýrari
Golli / Kjartan Þorbjörnsson
Neytendastofa hefur tekið ákvörðun um að í auglýsingum Hagkaups um svonefnda Tax Free daga komi fram, að afslátturinn nemi 20,32% en ekki 25,5% eins og hlutfall virðisaukaskatts er.
Neytendastofa segist hafa fengið ábendingar og fyrirspurnir frá neytendum, sem voru ósáttir við að fá einungis 20,32% afslátt þar sem þeir töldu sig eiga að fá 25,5% afslátt. Þá gerðu nytendur einnig athugsemdir við notkun hugtaksins Tax Free.
Í ákvörðun Neytendastofu kemur fram, að þrátt fyrir að ætla megi að flestir neytendur séu meðvitaðir um prósentuhlutfall virðisaukaskatts virðist þeir oft ekki gera sér grein fyrir því hvernig reikna skuli virðisaukaskatt af verði vöru. Í ljósi þess og þeirrar afdráttarlausu og skýru skyldu til að tilgreina prósentuhlutfall afsláttar teljur Neytendastofa nauðsynlegt að þess sé getið bæði á sölustað og í auglýsingum fyrir Tax Free að afslátturinn nemi 20,32%.
Neytendastofa
gerði aftur á móti ekki athugasemdir við notkun hugtaksins Tax Free.
Kvartað yfir auglýsingum Húsasmiðjunnar
Neytendastofa fjallaði einnig um kvörtun frá BYKO vegna Tax Free auglýsinga Húsasmiðjunnar en BYKO taldi þær brjóta gegn lögum um eftirlit með viðskiptaháttum og markaðssetningu.
Taldi BYKO m.a. auglýsingar vera villandi þar sem engin afsláttarprósenta kom fram í auglýsingunum og að í sumum tilvikum væru auglýsingarnar settar fram með þeim hætti að gefið væri í skyn að vara væri seld án virðisaukaskatts.
Neytendastofa féllst á þær athugasemdir Byko, að Húsasmiðjunni bæri að gefa upp prósentu afsláttar bæði í auglýsingum og á sölustað. Það yrði að koma fram að afslátturinn nemi 20,32% en ekki 25,5% eins og margir neytendur virtust gera ráð fyrir.
Í nokkrum auglýsingum Húsasmiðjunnar var kynnt að veittur væri Tax Free afsláttur af öllum vörum í verslun þrátt fyrir að gosdrykkir og sælgæti væri ekki selt með afslætti. Neytendastofa taldi Húsasmiðjuna þurfa að greina frá því í auglýsingum og á sölustað væru einhverjar vörur undanþegnar afslætti.
Neytendastofa féllst aftur á móti ekki á það með Byko að það væri villandi og ósanngjarnt gagnvart neytendum að geta þess ekki að virðisaukaskatti væri skilað til ríkissjóðs og að afslátturinn sé á kostnað Húsasmiðjunnar.
