Héraðsdómur Reykjaness. Ómar Óskarsson

Héraðsdómur Reykjaness hefur sýknað konu af kröfu karlmanns um að konan endurgreiði rúmlega 2 milljónir króna, sem maðurinn lagði inn á reikning hennar.

Deilt var um það fyrir dómi hvort um væri að ræða lán eða miskabætur, sem maðurinn ákvað að greiða konunni fyrir tjón sem hún varð fyrir vegna á líkama og sál vegna langvarandi hótana umsáturs og ofbeldis.

Fram kom í málinu, að maðurinn og konan voru saman um tíma á árinu 2006 og áttu í viðskiptasambandi til ársins 2009 en bæði ráku verslanir. Á ýmsu gekk í samskiptum þeirra og m.a. fullyrti konan að maðurinn hefði nauðgað sér árið 2007 þótt hún hefði ekki kært það til lögreglu. Maðurinn neitaði því.

Í byrjun síðasta árs átti fólkið nokkur samskipti. Maðurinn sagðist hafa viljað taka upp samband við konuna að nýju og orðið við beiðni hennar að lána henni peninga. Konan bar fyrir dómi, að maðurinn  hefði sagst vera nýr og betri maður og hún hefði farið nokkrum sinnum út að borða með honum.

Fljótlega hafi hegðun hans færst í sama horf og fyrr og hann hafi farið að áreita hana og mæta á heimili hennar drukkinn. Konan sagðist þá hafa slitið öllu sambandi við manninn og fékk í kjölfarið sett á hann nálgunarbann í sex mánuði. Þá hóf maðurinn innheimtuaðgerðir og krafðist þess að konan endurgreiddi peningana, sem hann lét henni í té. 

Fram kom einnig fyrir dómi, að í nóvember á síðasta ári kærði maðurinn konuna fyrir þjófnað. Konan viðurkenndi að hafa tekið  stílabók með bókhaldi verslunar mannsins ófrjálsri hendi en myndir af því náðust á öryggismyndavél.  

Ekki var deilt um að konan fékk samtals 2.050.000 krónur hjá manninum í janúar og febrúar 2010. Héraðsdómur segir hins vegar, að ósannað sé, að maðurinn hafi lánað konunni umrædda fjárhæð enda hefði maðurinn fyrir dómi borið, að ekki hefði verið rætt um það á sínum tíma að konunni bæri að endurgreiða fjárhæðina.

Þá liggi engar sannanir fyrir um að lán hafi verið að ræða annað en framburður mannsins, sem sé á skjön við framburð konunnar.