Lax stekkur í Straumunum, vatnamótum Norðurár og Hvítár. mbl.is/Einar Falur Ingólfsson

Norðurá varð fyrst laxveiðiáa til að brjóta þúsund laxa múrinn þetta sumarið en í gærkvöldi höfðu veiðst þar 1.170 laxar það sem af er sumri. Alls hefur veiðst 8.381 lax í sumar í þeim ám sem fylgst er með á vef Landsambands veiðifélaga. Er það næstum helmingi minna en á svipuðum tíma í fyrra.  En þá voru líka laxagöngurnar stórum fyrr á ferðinni en venja er til, segir í frétt á vef LV.

Heildarveiði í síðustu viku náði samt 3.416 löxum, sem er það langbesta þetta sumarið.  Meðalveiði í sömu viku undanfarin fimm ár er 3.473 laxar. 

„Ein af viðmiðunaránum okkar – Breiðdalsáin – hefur nú skilað betri veiði en á sama tíma í fyrra.  Hún er nú komin í 273 laxa, en hafði skilað 194 fiskum þann 21. júlí 2010.  Þetta er metárangur á þeim bæ.  Þar með hefur hún gefið 45,5 laxa á hverja stöng til þessa.  Þessi góði árangur styður þá spá að Norðaustur- og Austurlandið muni koma vel út þetta veiðisumar," segir á vef LV.

Ítarlega verður fjallað um veiðitölur vikunnar og fleira í veiðipistli Einars Fals Ingólfssonar í Morgunblaðinu á morgun.

 Hér er hægt að skoða tölur yfir veiði sumarsins á vef Landsambands veiðifélaga.